Hiniling ni Environment Secretary Roy A. Cimatu ang mabilisang resolusyon sa kasong iligal na pag-aresto at police brutality sa grupo ng environmental enforcers sa kamay ng mga tauhan ni Puerto Princesa City Police Director Col. Marion Balonglong.
Si Balonglong ang sinasabing dahilan sa iligal na pag-aresto sa walong empleyado ng Department of Environment and Natural Resources (DENR) at dalawang iba pa habang ginagawa ng mga ito ang kanilang trabaho sa Barangay Iwahig, Puerto Princesa City noong Hulyo 10.
Bagama’t nakaramdam ng galit ay sinabi ni Cimatu na isa lamang itong “isolated case” at hindi makaaapekto sa maayos na relasyon ng DENR at ng Philippine National Police (PNP) lalo na sa pagpapatupad ng environmental laws.
“As much as I’m furious at what happened to my men, I hope this incident won’t affect the cordial relationship and collaborative partnership the DENR has with the PNP in the fight against environmental crime,” saad pa ni Cimatu.
Isinangguni na rin ni Cimatu ang kaso kay Interior and Local Governmnet Secretary Eduardo M. Ano na siyang mayhawak sa PNP.
Base sa nakarating na ulat sa DENR Central Office sa Quezon City, kasalukuyang nagsasagawa ng imbestigasyon ang mga tauhan ng DENR kasama ang representante ng Bantay Bakawan at isang tanod tungkol sa walang pakundangang pagpuputol ng bakawan sa Sitio Bucana nang harangin ang mga ito ni Balonglong at ng kanyang mga tauhan.
Ang mga naturang DENR employee na nakatalaga sa Community Environment and Natural Resources Office (CENRO) ay kinabibilangan ng tatlong forester, apat na forest ranger at isang forest protection officer.
Noong una ay inakala ng grupo ng DENR na ang dumating na mga pulis ay ang kanilang magiging police security na kanilang hiniling sa PNP sa kanilang gagawing imbestigasyon ngunit laking gulat ng mga ito nang bigla silang kapkapan sa buong katawan at agad na pinadapa sa lupa.
Sinipa pa umano ni Balonglong ang isa sa mga forest ranger na si Roldan Alvarez na pinagbintangan nito na nagnakaw ng galvanized iron sheets.
Matapos ito ay sapilitang isinakay ang sampung katao sa police service vehicle at dinala sa bakanteng lote na pag-aari ni Balonglong at pagsapit dito ay inutusan ng police chief si Alvarez na lumuhod habang ang mga kasama nito ay tinatanong kung ano ang kanilang layunin sa pagpunta sa mangrove site.
Nang dalhin sa police station sa Barangay San Pedro ang DENR team ay agad na gumawa ng aksiyon si CENR Officer Felizardo Cayatoc na mapalaya ang sampung inaresto at ito rin ang nagpatunay na siya ang nag-utos sa mga ito na magsagawa ng operasyon sa naturang lugar.
Matapos ang mahabang pag-uusap ay pinalaya din ni Balonglong ang mga inaresto kapalit ng paglagda sa kasulutan na ang mga DENR personnel na inaresto ay nasa maayos na kondisyon.
Ang mga tauhan ng DENR ay hinaras, inaresto at ikinulong ni Balonglong at ng mga tauhan nito ay iligal dahil sa kawalan ng warrant o kahit na anong kasulutan ng paglabag. Si Alvarez ay nagtamo ng galos at pasa dahil sa ginawa sa kanyang pambubugbog.
“It is totally unacceptable that these environmental enforcers who continue to perform their duties despite the COVID-19 pandemic have to suffer violence at the hands of the police, who should be assisting them in their operations,” sabi pa ni Cimatu na hindi naitago ang nararamdamang galit.
Dahil dito ay tutulungan ni Cimatu na dati ring hepe ng Armed Forces of the Philippines, ang mga empleyado ng DENR sa pagsampa ng kaso laban kay Balonglong at sa mga tauhan nito.
