Anim na bayan na sa probinsya ng Romblon ang nagdeklara ng State of Calamity nitong mga nakaraang araw dahil sa pinsalang iniwan ng bagyong Tisoy sa probinsya ng Romblon.
Ito ay ang mga bayan ng Corcuera, Banton, Concepcion, Romblon, San Agustin, at Calatrava.
Ayon kay Governor Jose Riano, nagrekomenda na rin ang Provincial Disaster Risk Reduction and Management Council (PDRRMC) sa Sangguniang Panlalawigan na isailalim na ng State of Calamity ang buong lalawigan.
“Nagpulong na kami ngayong araw, dapat talaga magdeklara na sa buong probinsya dahil mahigit 3 bayan na ang nasa ilalim na ng State of Calamity,” ayon sa panayam ng Romblon News Network sa Gobernador.
Malaking tulong umano ang pagdedeklara ng State of Calamity para mas madagdagan ang tulong na makaabot sa mga lubusang naapektuhan ng bagyo.
Sinabi rin ng Gobernador na nagpapatuloy ang pamimigay ng relief goods ng provincial government sa mga nasalanta ng bagyo sa bayan ng Corcuera, Banton, at Concepcion kung saan maraming ari-arian ang iniwang sira ng bagyo.
Sakay ng pumpboat, agad na bumiyahe kahapon ng umaga ang mga tauhan ng Provincial Government at Philippine National Police para maghatid ng tulong sa mga residente ng tatlong isla.
Kasama nila ang Emergency Response Team ang Philippine Red Cross – Romblon Chapter na tumulong rin sa operasyon.
