Lumapit sa Sandiganbayan ang grupo nina dating Governor Eleandro ‘Budoy' Madrona, provincial agriculturist Geishler Fiedacan Fadri at senior agriculturist Oscar Placito Galos para hilingin na panagutin sa indirect contempt ang kanilang complainant.
Sinabi ng grupo na pinagusapan ng complainant na si dating Romblon Vice Mayor Lyndon Molino sa isang Facebook Group ang graft charge na kinakaharap ng grupo ni Madrona kaya dapat umanong magmulta ang complainant ng P30,000 at makulong ng anim na buwan kung mapatunayang guilty.
Binanggit umano ni Molino na ‘sure to be convicted' na ang tatlo at inuunahan umano nito ang desisyon ng Sandiganbayan sa Facebook Group na “Romblon Community” nitong February 2019 at inihambing pa sa kaso ni former Sorsogon Governor Raul Lee na napatunayang guilty sa parehong pamamaraan.
Ang pag-usapan ang kaso sa publiko ay violation umano sa sub judice rule at pwedeng panagutin sa ilalim ng Section 3, Rule 71 of the Rules of Court.
Sinabi sa petisyon na inihain ng grupo ni Madrona na nagbunga ng public impression ito na ‘since Governor Raul Lee was convicted by Sandiganbayan, petitioner Governor Eleandro Madrona will also be convicted by the Sandiganbayan'.
“In this case, respondent Molino’s above public pronouncements have attempted if not succeeded in trying to unduly influence the Court which prejudices the accused’s or petitioner’s right to a fair trial,” ayon pa sa petisyon.
Ang nasabing kaso ay kaugnay ‘overpriced' di umanong pagbili ng Provincial Government sa ilalim ni Madrona sa kompanyang Feshan Philippines Incorporated noong 2004 ng 3,333 piraso ng bote ng Bio Nature liquid organic fertilizer na nagkakahalaga ng P1,500 kada isa at hindi rin umano idinaan sa tamang bidding process.
Samantala, sinabi ni Molino sa isang pahayag na hindi pa siya nakakatanggap ng order mula sa Sandiganbayan kaugnay sa sinasabing petisyon ng grupo ni Madrona.
“Sakaling ako ay pasasagutin ng Korte sa naturang petisyon, sasagutin ko po iyan alinsunod sa batas at katotohanang nangyari. Malinis po ang aking budhi dahil wala akong kasalanan sa bayan,” sinabi nito.
