Matapos ang launching ng biyaheng Manila – Tablas at pabalik ng Cebu Pacific, gayun rin ang pagsasaayos ng airstrip sa bayan ng San Fernando, isusunod umano ni Governor Eduardo Firmalo sa susunod na taon ang paghahanap ng pwedeng airstrip sa Romblon Island kung saan matatagpuan ang kapitolyo ng probinsya.
Ayon kay Governor Firmalo ng makapanayam ng mga mamahayag nitong Miyerkules, kailangan na umanong mag modernize sa mga uri ng transportasyon ang probinsya ng Romblon lalo na umano ngayong dumarami na ang mga turista at pumapasok na business sa lalawigan.
“Yung sa Azagra, may budget na yun. Later on, on the next two years, yung tatlong Island gagawan na natin (aerodrom). We have to modernize na,” ayon sa Gobernador.
Tinitingnan umano nila ang posibilidad na katulad sa AirJuan Airlines na inaasahang babiyahe na sa Azagra Airstrip sa mga susunod na buwan, ang mag-ooperate rin sa bayan ng Romblon.
Ang pagkakaroon umano ng airstrip sa tatlong isla ay magbibigay ng mas madaling connectivity patungo sa ibang probinsya katulad nalang umano kung biyaheng Cebu or Puerto Princessa City, Palawan; kesa pumunta pa umanong Manila, pwedeng sa Caticlan nalang sumakay patungo sa mga nasabing lugar.
“Ang pinaka praktikal jan, kung pupunta ka sa Romblon Airport sa Tugdan (galing Romblon or Azagra), aabot lamang ng 15 minutes ang biyahe mo. So susunod jan pwede na sa San Jose sa Occidental Mindoro, Caticlan, or Kalibo, Aklan,” pahayag ng Gobernador.