Personal na nasilayan ni Bise Presidente Leni Robredo ang pinsala sa lalawigan ng Marinduque matapos ang matinding paghagupit ng Bagyong Nina dito noong nakaraang taon.
Ayon sa pangalawang pangulo, ang pagbisita niya sa probinsya ay nakatuon sa pag-re-rehabilitate bukod pa sa mga relief goods na nauna nang naipadala ng staff niya mula sa Office of the Vice-President.
Kahapon, ganap na ika-8 ng umaga ay dumating ang Pangalawang Pangulo sa Torrijos Central School upang personal nyang makita ang mga pangangailangan ng mga mag-aaral na nawalan ng silid-aralan.
“Dapat as soon as possible lalo na ang mga paaralan kasi ‘yong mga paaralan ay napakahalaga talaga kasi ‘yong reklamo ngayon ng mga school, sinisiksik nila ‘yong kanilang mga estudyante sa kung saan-saan na mga classrooms”, sabi ni Robredo.
Bukod sa mga eskwelahan, pinuntahan din ni Robredo ang mga ospital maging ang mga kabahayan na malapit sa mga baybaying lugar upang malaman ang mga tulong na dapat mapunan para sa mga nabiktimang mamamayan.
“Titingnan natin ‘yong extent at kung anong klaseng tulong ang kinakailangan. Ang LGUs ng iba’t-ibang bayan na dinaanan natin meron nang mga wish list. ‘Yong promise naman natin tututukan natin na sa lalong madaling panahon e maibaba ‘yong tulong para sa kanila”, ayon kay Robredo.
Para naman sa sektor ng agrikultura, natalakay naman ni Robredo na kailangang gumawa ng gobyerno ng isang programa na makakatulong sa kanila na kung saan ay umabot sa P1.5 bilyon ang naiwang bakas na pinsala ng bagyong Nina.
“Iyon na nga po ang napag-usapan namin ni Vice-Governor at ng mga miyembro ng Sangguniang Panlalawigan kung papaano natin matutulungan ang ating mga nasalanta lalo na ang mga nasa sektor ng agrikultura dahil sila talaga ‘yong pagkatapos ng relief operation na ito, sila ‘yong walang hanapbuhay at kung walang hanapbuhay, sila ‘yong walang makakain. Kaya kaming nasa gobyerno kailangan silang gawan ng programa na pangtawid gutom maliban sa pananim na itutulong sa kanila”, ani Robredo.
Ikinatuwa naman ng pangalawang pangulo ang pagbisita rin ni Department of Agriculture (DA) Secretary Emmanuel Piñol na namigay ng tulong sa mga mangingisda at magsasaka upang maipamahagi ang assistance fund at mga pampalit na kagamitan para sa kanilang mga nasirang ari-arian.
Lubos naman ang kagalakan ng Provincial Disaster Risk Reduction Management Office na si Rolando Josue sa personal na pagsaksi ni Robredo sa mga napinsalaan ng nagdaang bagyo. Aniya, ito ay malaking bagay para sa kanila at naging dahilan ito ng pagbibigay ng lakas loob at pag-asa upang mapanumbalik ang dating pamumuhay ng kaniyang mga kalalawigan. (Adrian D. Sto. Domingo, PIA-MIMAROPA/MARINDUQUE)
