Nagpahayag ng kalungkutan at pagkaawa si Department of Agriculture (DA) Secretary Emmanuel F. Piñol sa mga magsasaka at mangingisda ng Marinduque nang makita niya ang iniwang pagkasira sa agrikultura sa lalawigan.
Sa kanyang pananalita sa iginawang diyalogo na may temang “Tapatan: Gobyerno at Mamamayan, Dialogue with Farmers and Fisherfolk and Ceremonial Turn-Over of Agricultural and Fishery Inventions” sa Provincial Convention Center, ipinaabot nya ang kanyang pagkahabag sa mga kapwa niya magsasaka at mangingisda dahil sa kulang na pagbibigay tuon ng mga mamamahayag sa kapinsalaan na iniwan ng nagdaang Bagyong Nina sa probinsya ng Marinduque.
Ani Piñol, sa kanyang pagtataya ay mas malaki talaga ang kasiraan sa mga pananim lalo na sa sektor ng sagingan kung ikukumpara ang nakita niyang pinsala sa Camarines Sur noong bisitahin niya ito kamakailan.
Base kasi sa huling tala ng Provincial Agriculturist Office (PAO) Marinduque na isinumite sa Provincial Risk Reduction Management Office, umabot na sa P1.5 bilyon ang estimated cost of damage sa mga pananim ng mga magsasaka at nangunguna nga rito sa lubusang binayo ng bagyo ay ang buong taniman ng saging na pumapatak sa P1.3 bilyon ang halaga ng lahat ng punong winasak ng bagyo sa buong 5,162 hekteryang lupain sa buong probinsya. Tinataya namang pumalo na sa P3.7 milyon ang ikinalugi ng mga magsasaka sa kanilang mga alagang manok, baboy, baka, kalabaw, kambing at kabayo mula sa huling kalkula ng Provincial Veterinary Office (PVetO) noong nakaraang Lunes at sinasabing P4 milyon naman ang ikinatalo sa sector ng pangisdaan.
Kaya naman sa pagbisita ng kalihim ay nagbigay ang DA ng rehabilitation assistance fund sa bawat bayan ng Marinduque upang matugunan ang pangangailan ng mga magsasaka at mangingisda: 4,000 piraso ng coffee planting materials para sa 6 na munisipalidad at 11,000 piraso ng cacao planting materials para sa Bayan ng Boac at 9,000 piraso naman para sa mga Bayan ng Mogpog, Sta. Cruz, Torrijos, Buenavista at Gasan.
Nakatangggap din ang pamahalaang panlalawigan sa katauhan ni Gov. Carmencita O. Reyes ng nagkakahalagang P3,136,000 na binubuo ng 25 upgraded dairy goats 1,000 bags ng certified palay seeds, 50 bags ng ordinary hybrid corn seeds, 40 kgs. ng assorted vegetable seeds, 6,000 piraso ng coffee planting materials, 9,000 piraso ng cacao planting materials. Maging ang Provincial Veterinary Office ay nabigyan din ng drugs and biological products assistance para sa mga kahayupan na kaagapay ng mga magsasaka sa kabukiran na nagkakahalagang P35,376.
Bukod pa rito ay ipinamahagi rin ni Sec. Piñol ang 50 motor para sa kanilang mga bangka, 50 lambat at 10 handlines sa mga mangingisdang naapektuhan ng nagdaang bagyo. Nangako pa rin ang kalihim na magpapadala pa rin sila ng 50 fiber-glass boats sa bawat bayan kung saan ang bawat isang bangka ay magiging pagmamay-ari ng dalawang pamilya. Magpapadala din daw ang nasabing ahensya ng boat molder na kung saan ay ang mga mangingisda na ang maghuhulma ng kanilang ninanais na maging bangka. (Adrian D. Sto. Domingo, PIA-MIMAROPA/Marinduque)
