Arestado sa anti-illegal drugs operation ng Cajidiocan Municiapal Police Station sa pangunguna ni Police Inspector Edwin Bautista ang number one drug personality ng bayan ng Cajidiocan nitong huwebes ng hapon.
Sa bisa ng isang search warrant, pinasok ng Cajidiocan MPS ang bahay ng target na si Angeles Rotoni Jr., 49-taong gulang, residente ng Brgy. Cambijang, Cajidiocan, Romblon.
Ayon sa pulisya, pagdating nila sa bahay ng suspek na si Alias Jagak para i-serve ang search warrant, kusa umanong inabot sa kanila ni Jagak ang isang plastic sachet na may lamang pinaghihinilaang shabu na may street value na P4,000.
Sa paghahalughug ng pulisya, nakuha sa bahay ang ilang drug paraphernalia, mga pera, at ilan pang empty na di umanoy ginagamit sa pag repack ng shabu.
Si Angeles Rotoni Jr. ay ama ng naaresto sa San Fernando nitong nakalipas na araw na nakuhaan rin ng iligal na droga.
Isinagawa ang operasyon sa harap nina SB Member Marvin “Greggy” Ramos at Brgy. Chairman Octaviano Ramirez Jr. ng Brgy. Cambijang, Cajidiocan, Romblon.
Nakakulong na ngayon si Rotoni sa Cajidiocan Municipal Police Station at nakatakdang sampahan ng kaukulang kaso.
