Dalawang taga-Romblon ang kasama sa 22 overseas Filipino workers na nagtatrabahong truck driver ang na-rescue ng Danish authorities nitong nakaraang buwan sa Padborg, Denmark.
Ekslusibong nakapanayam ng Romblon News Network ang isa sa mga OFW na tubong Odiongan, Romblon at ikwenento nito sa news team ang hirap na naranasan sa nabanggit na bansa.
Ayon sa biktimang itatago nalang natin ang pangalan, mula Odiongan ay tinawagan sila ng agency para papasukin bilang truck driver sa Poland ngunit matapos ang tatlong linggo ay inilipat sila sa Padborg, Denmark at dito na pinagtrabaho.
Dito na nila naranasan ang hirap sa trabaho dahil hindi umano sila binabayaran ng overtime pay, at hindi rin umano natupad ang pangako sa kontrata sa kanila na libreng akomodasyon, at libreng pagkain. Nakapaloob sa kanilang kontrata na dapat may sasahurin silang 1060 EUR kada buwan kasama ang meal allowance, free accommodation, OT Payment, medical benefits, at life insurance, ngunit hindi umano natupad ang ilan sa mga ito.
Bago sila mailigtas ng Danish authorities ay natutulog ang dalawang Romblomanon kasama ang ilan pang truck drivers sa mga container truck na walang heater, walang maayos na higaan, kusina o toilet.
“Mahirap lalo ngayon dahil winter na, masyado ng malamig sa labas, mabuti nga at na-rescue kami ng otoridad,” pahayag ng isa sa mga driver.
Sa balita ng ABS-CBN, sinabi ng 3F Union, ang tumulong sa Pinoy truck drivers, na legal ang papeles ng mga Pilipino sapagkat bilang truckers, natural lamang na magpalipat-lipat sila ng lugar at sila ay naikot sa Europa. Ngunit dahil lagpas na sa 6 na buwan o mahigit 1 taon ang pamamalagi ng ilan sa Denmark, tinitingnan nila ang anggulo na maipantay ang sahod ng mga ito base sa normal na sahod ng local truck drivers.
“As far as we can see, the most stationed that they have been is at Padborg,(Denmark) and if that’s the case, we try to see if we can make a claim that they should be driving under the Danish agreement of driving.” Ayon kay Steen Noerhart, secretary ng 3F Union-Aabenraa.
Ayon sa kanilang report, ang normal na sahod ng isang truck driver kada buwan ay nasa 26,000-32,000 Danish Kroner o 3500-4300 EUR kada buwan, malayo sa pinirmahan nilang kontrata na 1060 EUR sapagkat sila ay nakabase na sa Denmark at hindi sa Poland.
Ito ay maihahalintulad na isang kaso ng ’social dumping’ sapagkat ang pasahod na natatangap ng mga Pilipino ay hindi naayon sa ekonomiya ng kasalukuyang bansang kinalalagyan nila.
Humihiling ang dalawang Romblomanon na matulungan sila ng Philippine Government kung sakaling ma-deport sila sa susunod na buwan pabalik ng bansa.
Sa ngayon, pinatuloy muna ng Danish authorities ang mga nailigtas na OFW kasama ang dalawang Romblomanon sa isang hotel kung saan sagot ng Danish Government ang lahat ng gastusin.
Patuloy naman ang ginagawang pakikipagtulungan ng PH Embassy sa gobyerno ng Denmark para sa mabilis na solusyon sa kaso ng mga Pinoy, samantala, wala pang pahayag ang United Primover Enterprises Inc., ang agency na di umano'y nag proseso sa papeles ng mga Pinoy truck drivers.
