Sinimulan na ng lokal na pamahalaan ng Cajidiocan ang paghahanda para sa nalalapit na fiesta ng bayan, apat na buwan bago ang pagdiriwang, upang matiyak na magiging maayos at makabuluhan ang mga nakatakdang programa at aktibidad.
Sa panayam, sinabi ni Mayor Marvin “Greggy” Ramos na maaga nilang sinimulan ang pagpaplano upang matukoy ang mga posibleng hamon, kabilang ang paglalaan ng badyet at pagbuo ng mga bagong aktibidad na hindi lamang uulit sa mga programa noong nakaraang taon.
Ayon sa alkalde, mahalagang mapaghandaan ang fiesta dahil bukod sa pagdiriwang ng komunidad, nagiging pagkakataon din ito upang pasiglahin ang lokal na ekonomiya.
Ipinaliwanag niya na nakikinabang ang mga lokal na negosyante at residente sa pagdagsa ng mga bisita na gumagastos para sa pagkain at iba pang pangangailangan habang nakikilahok sa mga aktibidad ng fiesta.
Binigyang-diin din ni Ramos na hindi lamang pang-ekonomiyang benepisyo ang nais makamit ng lokal na pamahalaan sa pagdiriwang. Nais din nitong mabigyan ng pagkakataon ang mga residente na makapagpahinga, magsaya at magsama-sama sa kabila ng mga hamong kinakaharap sa araw-araw.


























