Arestado ang isang 26-anyos na residente ng Odiongan, Romblon matapos makumpiskahan ng hinihinalang marijuana sa Batangas Terminal Port sa Batangas City kahpaon, November 9.
Nabatid na napansin ng mga security personnel ang kahina-hinalang lighter habang nagsasagawa ng regular na inspeksyon sa mga bagahe sa Zone 3 ng nasabing pantalan.
Sa isinagawang pagsusuri sa mga gamit ng suspek, nadiskubre ang isang metal na lalagyan na naglalaman ng mga bagay na kahawig ng sigarilyong nakabalot sa brown paper, gayundin ng isang lighter.
Agad namang humingi ng tulong ang port security sa Philippine Coast Guard (PCG) upang magsagawa ng K9 inspection sa tulong ng Coast Guard K9 Team Batangas.
Gumamit ng dalawang narcotics detection dogs sa inspeksyon na kapwa nagpakita ng positibong indikasyon sa presensya ng hinihinalang ilegal na droga.
Nasamsam mula sa suspek ang ilang stick ng hinihinalang marijuana, mga dahon nito, rolling papers, smoking pipe at iba pang personal na gamit.
Dinala ang mga nakumpiskang bagay sa PNP Maritime Group para sa laboratory examination, habang nananatili naman sa kustodiya nito ang suspek na nahaharap sa kasong paglabag sa Republic Act No. 9165 o Comprehensive Dangerous Drugs Act of 2002.
