Apat na mangingisda ang nahuli matapos maaktuhang gumagamit ng air compressor bilang breathing apparatus sa ilegal na pangingisda sa karagatang sakop ng Sitio Maglihi, Barangay Marigondon, Cajidiocan, Romblon.
Isinagawa ang seaborne law enforcement operation ng Cajidiocan Municipal Police Station (MPS) katuwang ang Philippine Coast Guard–Cajidiocan.
Pinangunahan ito ni PLT Peter R. Rios sa ilalim ng superbisyon ni PCPT Mary Jade M. Gaca, Officer-in-Charge ng Cajidiocan MPS, kasama ang mga tauhan ng Philippine Coast Guard–Cajidiocan sa pangunguna ni CG PO1 Paul Anthony T. Marceño.
Bandang alas-11:30 ng umaga nang maaktuhan ng mga operatiba ang apat na mangingisda na gumagamit ng air compressor sa kanilang pangingisda.
Mahigpit na ipinagbabawal ang paggamit ng air compressor sa pangingisda at iba pang underwater activities sa municipal waters ng Cajidiocan sa ilalim ng Municipal Ordinance No. 03-11, Section 67.
Nakumpiska sa operasyon ang isang fishing boat na nagkakahalaga ng tinatayang ₱17,000, isang aluminum air tank compressor na ₱2,500, apat na pares ng flippers na ₱500, apat na tempered goggles na ₱3,600, at tinatayang 100 metro ng air hose na ₱2,400.
Dinala sa Cajidiocan MPS ang mga nahuling indibidwal at mga nakumpiskang kagamitan para sa dokumentasyon at paghahanda ng kaukulang kaso.
