Hinikayat ng Tablas Island Electric Cooperative (TIELCO) ang mga residente at may-ari ng negosyo sa Romblon na ipagbigay-alam sa kanilang tanggapan ang anumang planong pagpapakabit ng solar power system upang maiwasan ang mga aksidente at maprotektahan ang mga pasilidad ng kooperatiba at ang mga lineman nito.
Inihayag ito ni TIELCO General Manager Dennis Alag sa gitna ng patuloy na talakayan hinggil sa sitwasyon ng suplay ng kuryente sa lalawigan, kung saan binigyang-diin ang kahalagahan ng pagsunod sa mga teknikal at legal na alituntunin sa paggamit ng renewable energy.
Ayon kay Alag, ang hindi naipapaalam na pagpapakabit ng solar panels ay maaaring magdulot ng backfeeding, o ang pagdaloy pabalik ng sobrang kuryente mula sa solar power system patungo sa pangunahing linya ng distribusyon.
“In case po na siya ang cause nung halimbawa, masira ‘yung transformer at nabatid namin na nanggaling sa kaniya, siya ang liable doon sa aksyon,” babala ni TIELCO General Manager Dennis Alag.
Ipinaliwanag ni Alag na bukod sa posibilidad na masira ang mga transformer, maaari ring malagay sa panganib ang buhay ng mga lineman na nagsasagawa ng pagkukumpuni sa linya kung hindi nila alam na may pumapasok pa ring kuryente mula sa isang pribadong solar installation.
Bilang bahagi ng pagpapalakas ng mga hakbang sa kaligtasan, nagpahayag din ang TIELCO ng suporta sa panukalang ordinansa ng Sangguniang Panlalawigan ng Romblon na magtatakda ng malinaw na mga alituntunin sa pagpapakabit ng mga solar power system sa lalawigan.
“It would be better po kung if there is an ordinance coming from the provincial government for safety purposes na mai-pass po nila, that would be better for us, for safety… for just safety reasons,” dagdag ni Alag.
Ayon sa TIELCO, ang simpleng pag-abiso sa kooperatiba bago ang pagpapakabit ng solar panels ay makatutulong upang matiyak ang kaligtasan ng may-ari ng sistema, ng mga lineman, at ng buong komunidad.
Discussion about this post