Nagpahayag ng pasasalamat ang ilang benepisyaryo ng Pantawid Pamilyang Pilipino Program (4Ps) sa Romblon matapos matanggap ang ₱2,000 one-time cash assistance sa ilalim ng Unified Package for Livelihoods, Industry, Food, and Transport (UPLIFT) Program ng pamahalaan.
Ayon kay Adelaida Lucban, malaking ginhawa ang natanggap na ayuda dahil wala na silang pambili ng pangunahing pangangailangan ng pamilya.
“Masaya po kami. Diretso ito sa vitamins at bigasan. Wala na talaga kami kanina at mangungutang sana ako. Pagkakita ko sa cellphone na may ₱2,000 na, sabi ko, ‘Thank you, Lord.' Pagkagising ko kaninang umaga, nalaman kong puwede na itong i-withdraw kaya agad akong pumunta. Sobrang saya at sobrang salamat po sa blessing na ito,” pahayag ni Lucban.
Ganito rin ang naramdaman ni Maribel Moaje, na nagsabing malaking tulong ang natanggap nilang ayuda sa kanilang pang-araw-araw na pangangailangan.
“Happy, happy talaga dahil may pambili na ako ng bigas. Wala kaming pangsaing ngayon, may pangsaing na kami,” aniya.
Samantala, sinabi naman ni Juliet Urbano na makatutulong ang cash assistance bilang dagdag na kita ng kanilang pamilya.
“Maraming salamat. Pangdagdag income na rin iyon,” ayon kay Urbano..
Batay sa Department of Social Welfare and Development (DSWD), ang UPLIFT Program ay nagbibigay ng ₱2,000 one-time financial assistance sa lahat ng registered at active 4Ps beneficiaries, kabilang ang ilang inactive households na nasa ilalim ng Compliance Status (CS) 15 at CS19 na kasalukuyang sumasailalim sa validation.
Layunin ng programa na matulungan ang mga mahihirap na pamilya sa gitna ng patuloy na pagtaas ng presyo ng mga pangunahing bilihin.
