Naglabas ng magkahiwalay na pahayag ang Iglesia Filipina Independiente (IFI) Diocese of Odiongan at ang Filipino Chaplaincy ng Diocese of Leicester, Church of England upang tutulan ang anumang uri ng pagmimina sa Isla ng Sibuyan, kasunod ng pag-apruba ng Sangguniang Bayan ng San Fernando sa resolusyong nag-eendorso sa aplikasyon ng Altai Philippines Mining Corporation (APMC).
Sa opisyal na pahayag ng IFI Diocese of Odiongan, sinabi nitong mariin nitong tinututulan ang anumang uri ng pagmimina sa Sibuyan dahil naniniwala itong ang likas na yaman ng isla ay banal na kaloob ng Diyos na dapat pangalagaan at hindi sirain kapalit ng pansamantalang pakinabang.
Ayon sa diyosesis, ang tunay na kaunlaran ay hindi nasusukat sa mabilis na pag-unlad ng ekonomiya kundi sa pangmatagalang pangangalaga sa kalikasan, dignidad ng tao, at kabutihang panlahat.
Binigyang-diin din nito na ang pagmimina ay maaaring magdulot ng pagkasira ng kagubatan, kabundukan, mga ilog, yamang-dagat, kabuhayan, at natatanging biodiversity ng Sibuyan.
Nanawagan din ang diyosesis sa mga halal na opisyal ng Sibuyan at sa Pamahalaang Panlalawigan ng Romblon na magkaisa sa pagtutol sa pagmimina upang mapangalagaan ang isla para sa susunod na mga henerasyon.
Samantala, nagpahayag din ng pagkabahala ang Filipino Chaplaincy ng Diocese of Leicester, Church of England sa naging pag-apruba ng Sangguniang Bayan ng San Fernando sa mga resolusyong sumusuporta sa aplikasyon ng APMC para sa mining project feasibility, operasyon, miscellaneous lease agreement, at tree cutting permit.
Ayon sa grupo, taliwas umano ang naturang hakbang sa mga inisyatiba ng lokal na pamahalaan para sa pangangalaga ng kalikasan, tulad ng mga clean-up drive at tree-planting activities.
Binanggit din ng chaplaincy na nauna nang nagpasa ng resolusyon ang Barangay España na tumututol at nagbabawal sa pagmimina sa kanilang nasasakupan. Anila, mahalagang pakinggan ang tinig ng mga residenteng direktang maaapektuhan ng proyekto.
Iginiit pa ng grupo na ang pagmimina sa isang ecologically sensitive area tulad ng Sibuyan ay maaaring magdulot ng pagkawala ng biodiversity, pagguho ng lupa, polusyon sa mga ilog at karagatan, pinsala sa agrikultura at pangisdaan, pagbagsak ng turismo, mas matinding pagbaha, at hidwaan sa mga komunidad.
Nanawagan din ang chaplaincy sa mga lider ng simbahan, mga opisyal ng pamahalaan, at iba pang sektor na pangalagaan ang kalikasan, igalang ang umiiral na mga batas pangkalikasan, at tiyaking napapakinggan ang mga apektadong komunidad bago isulong ang mga proyektong may malaking epekto sa kapaligiran.
Ang magkahiwalay na pahayag ng dalawang religious organizations ay kasunod ng lumalawak na diskusyon hinggil sa pagmimina sa Sibuyan, na kilala sa mayamang biodiversity at tinaguriang “Galapagos of Asia.”
Discussion about this post