Sinimulan na ng mga magsasaka sa mga bayan ng Looc at Odiongan ang paghahanda ng kanilang mga palayan matapos ang tuloy-tuloy na pag-ulan na dulot ng pinaigting na Habagat na pinalalakas ng Bagyong Inday.
Nitong July 11, abala na ang mga magsasaka sa pagbubungkal at pag-aararo ng kanilang mga sakahan matapos magkaroon ng sapat na tubig ang mga dating tuyong palayan.
Ayon sa mga magsasaka, malaking tulong ang patuloy na pag-ulan dahil nabawasan ang kanilang gastusin sa pagpapatubig at naging mas madali ang paghahanda ng lupa para sa pagsisimula ng panahon ng pagtatanim.
Umaasa rin silang magpapatuloy ang sapat na pag-ulan upang maging maayos ang pagtatanim at mapataas ang produksyon ng palay sa darating na anihan.
Samantala, nagbabala ang Philippine Atmospheric, Geophysical and Astronomical Services Administration (PAGASA) sa posibilidad ng 50 hanggang 100 millimeters na pag-ulan sa Romblon hanggang Linggo bunsod ng Habagat na pinalalakas ng Bagyong Inday.
Sa kabila nito, pinayuhan ng PAGASA at mga lokal na awtoridad ang mga magsasaka na mag-ingat sa pagtatrabaho sa bukid dahil sa banta ng biglaang pagbaha at pagguho ng lupa sa ilang lugar.
