Kakatawan ang Public Employment Service Office (PESO) ng Romblon sa MIMAROPA sa National Search for Best PESO matapos itong makapasa sa isinagawang regional evaluation ng Department of Labor and Employment (DOLE) MIMAROPA noong Hunyo 17.
Kasama ng PESO Marinduque, napili ang PESO Romblon upang katawanin ang rehiyon sa pambansang kompetisyon na kumikilala sa mga lokal na tanggapan ng trabaho na nagpapatupad ng mahusay na serbisyo para sa mga naghahanap ng trabaho at mga employer.
Sinuri ng regional evaluation panel ang mga kalahok batay sa iba't ibang pamantayan kabilang ang paghahatid ng mga pangunahing employment services, pagsunod sa reporting requirements, pagpapatupad ng mga programa, suporta ng lokal na pamahalaan, at mga naitalang accomplishment ng tanggapan.
Binubuo ang evaluation panel ng mga kinatawan mula sa DOLE, Regional Tripartite Wages and Productivity Board, Department of the Interior and Local Government (DILG), Philippine Information Agency (PIA), at pribadong sektor.
Ayon sa DOLE, kabilang sa mga serbisyong isinasaalang-alang sa pagpili ang job referral at placement services, pagbibigay ng labor market information, career guidance, at regular na operasyon ng tanggapan sa buong taon.
Tanging mga PESO na may regular na operasyon at kumpletong pagsusumite ng mga kinakailangang ulat ang kwalipikadong makasali sa pambansang paghahanap.
Sinabi ni DOLE MIMAROPA Regional Director Naomi Lyn C. Abellana na hangad ng ahensya na mas marami pang PESO sa rehiyon ang makilahok sa mga susunod na taon.
Layunin ng National Search for Best PESO na kilalanin ang mga natatanging local employment office na tumutulong sa pag-uugnay ng mga naghahanap ng trabaho sa mga employer at nagbibigay ng impormasyon hinggil sa mga oportunidad sa trabaho at career development.
Inaasahang sasailalim pa sa pambansang ebalwasyon ang PESO Romblon at PESO Marinduque bilang mga kinatawan ng MIMAROPA sa naturang kompetisyon.
Discussion about this post