Mahigit 40 job contractual workers ng Lokal na Pamahalaan ng Cajidiocan ang sinuspinde hanggang Biyernes matapos hindi dumalo sa isinagawang flag ceremony noong Lunes.
Ito ang kinumpirma ni Cajidiocan Mayor Marvin Ramos, na nagsabing sakop ng suspensyon ang mga contractual personnel mula sa iba't ibang tanggapan ng munisipyo, kabilang ang ilang kawani ng Office of the Mayor.
Ayon kay Ramos, ilang ulit nang pinaalalahanan at binalaan ang mga empleyado hinggil sa kahalagahan ng pagdalo sa lingguhang flag ceremony bago ipinatupad ang suspensyon.
Sinabi ng alkalde na bahagi ng tungkulin ng mga kawani ng pamahalaan ang pakikilahok sa mga opisyal na aktibidad ng lokal na pamahalaan, kabilang ang pagpupugay sa watawat tuwing Lunes.
Dagdag niya, layunin ng hakbang na paalalahanan ang mga empleyado tungkol sa kanilang mga responsibilidad bilang kawani ng gobyerno at sa kahalagahan ng pagsunod sa mga alituntunin sa serbisyo publiko.
Ayon pa kay Ramos, inaasahan niyang magsisilbing paalala ang insidente sa mga empleyado ng lokal na pamahalaan hinggil sa disiplina sa trabaho at pagganap sa kanilang mga tungkulin.
Discussion about this post