Arestado ang isang incumbent Sangguniang Bayan (SB) member ng Alcantara at kasama nito matapos mahulihan ng baril at bala sa isinagawang search warrant operation sa Barangay Mat-I, Santa Fe, Romblon nitong Huwebes, April 23.
Isinagawa ang operasyon bandang alas-8:15 ng umaga sa bisa ng isang Search Warrant na inisyu ni Hon. Edwin B. Buffe, Executive Judge ng Regional Trial Court Branch 82 sa Odiongan, kaugnay ng paglabag sa Republic Act No. 10591.
Pinangunahan ang operasyon ng Criminal Investigation and Detection Group (CIDG) Romblon Provincial Field Unit katuwang ang Santa Fe Municipal Police Station, Regional Intelligence Unit 4B – PIT Romblon, at Romblon RIT ng Regional Intelligence Division ng PRO MIMAROPA.
Sa isinagawang paghahalughog sa bahay ng mga suspek, nakumpiska ang isang kalibre .38 revolver at anim na piraso ng bala.
Ayon sa pulisya, isinagawa ang operasyon sa presensya ng mga barangay opisyal at saksi, at ginamitan ng body-worn cameras ang mga operatiba. Naipaalam din umano sa mga suspek ang kanilang karapatan alinsunod sa umiiral na batas.
Dinala ang mga naaresto sa CIDG Romblon Provincial Field Unit para sa dokumentasyon at pagsasampa ng kaukulang kaso. Patuloy ang imbestigasyon ng mga awtoridad kaugnay ng insidente.
Wala pang pahayag ang SB member at ang kasama nito tungkol sa pagkakahuli sa kanila.
Discussion about this post