Nakahanda nang tumulak patungong Nova Scotia, Canada ang 21 delegado mula sa Romblon State University (RSU) para lumahok sa tatlong linggong summer enrichment program sa Dalhousie University.
Ang delegasyon ay binubuo ng 18 estudyante at 3 faculty members mula sa mga kursong may kaugnayan sa Agriculture, Fisheries, at Biosystems Engineering.
Layunin ng programa na palalimin ang kaalaman at karanasan ng mga kalahok sa larangan ng agham-pang-agrikultura sa pamamagitan ng mga hands-on activities, lectures, at collaborative learning kasama ang mga eksperto sa Dalhousie University.
Ang Dalhousie University ay matagal nang katuwang ng RSU sa mga proyektong pang-akademiko at pagpapahusay ng mga programa sa Agrikultura. Bahagi ito ng patuloy na internationalization efforts ng unibersidad upang bigyan ng global exposure at advanced learning opportunities ang kanilang mga estudyante at guro.
Magtatagal ang summer enrichment camp hanggang July 2.
