Sugatan ang isang lalaki sa Sibuyan Island, Romblon matapos itong mabaril ng speargun ng kaalitan nitong tanghali ng Miyerkules, May 22.
Ang biktima ay kinilala ng pulisya na si Reymark Riño Rio, 29, habang ang suspek naman ay kinilalang si Jay-ar Espinosa Batersal, 38, pawang mga residente ng Barangay Agutay, Magdiwang.
Ayon sa ulat ng pulisya, nakasalubong ng nakainum na suspek ang nakainum din na biktima habang papunta ang una sa dagat. Nagkaroon umano ng pagtatalo sa dalawa nang magkasalubong dahil sa nakaraang alitan. Habang nagtatalo ay nagalit di umano ang suspek sa biktima at binaril ito gamit ang dalang speargun.
Agad namang dinala sa Magdiwang Rural Health Unit ang biktima at kalaunan ay inilipat sa Sibuyan District Hospital para sa matutukan ang paggamot.
Naaresto naman ang suspek sa isang follow-up operation na ikinasa ng Magdiwang Municipal Police Station. Nakuha din sa suspek ang ginamit di umanong speargun sa krimen.
Nakakulong na ito at mahaharap sa kasong frustrated homicide.
