Mahigit 983,000 guro sa mga pampublikong paaralan sa ilalim ng Department of Education (DepEd) ang nakatakdang tumanggap ng ₱1,000 World Teachers’ Day Incentive Benefit (WTDIB) sa October 5, kasabay ng pagdiriwang ng World Teachers’ Day at National Teachers’ Day.
Ayon kay House Assistant Minority Leader at Eastern Samar Rep. Christopher Sheen Gonzales, ₱983.5 milyon ang nakalaang pondo para sa insentibo ngayong taon sa ilalim ng 2026 General Appropriations Law, na may probisyon para matiyak ang maagap na pagpapalabas nito.
Sinabi ni Gonzales na mananatiling prayoridad ang taunang insentibo para sa mga guro. Naghain din umano sila ng panukalang batas upang madagdagan ang halaga ng benepisyo.
Magkasamang inihain nina Gonzales at House Minority Leader at 4Ps Party-list Rep. Marcelino Libanan ang House Bill No. 4531, na naglalayong itaas sa ₱3,000 ang WTDIB mula sa kasalukuyang ₱1,000 at gawing permanenteng taunang benepisyo para sa mga pampublikong guro. Inaprubahan ng House Committee on Basic Education and Culture ang panukala, subject to style, noong May 18, 2026.
Ayon kay Gonzales, ang iminungkahing pagtaas ay pagkilala sa kontribusyon ng mga guro sa sistema ng edukasyon at pagbibigay ng konkretong suporta sa kanilang serbisyo. Gayunman, panukala pa lamang ang HB 4531 at hindi pa ito umiiral na batas.
Ipinagdiriwang ang World Teachers’ Day tuwing October 5 simula 1994 sa pangunguna ng United Nations Educational, Scientific and Cultural Organization (UNESCO) upang kilalanin ang mahalagang papel ng mga guro sa paghubog ng lipunan.
Sa Pilipinas, idineklara rin ang October 5 bilang National Teachers’ Day sa ilalim ng Republic Act No. 10743 bilang pagkilala sa dedikasyon at serbisyo ng mga Pilipinong guro.
