Sinuportahan ng Department of Trade and Industry (DTI) Romblon ang digitalization ng pampublikong palengke sa Calatrava, kung saan maaari nang gumamit ng cashless payment ang mga mamimili, kabilang sa pagbili ng isda at karne sa wet market.
Sa ginanap na Kapihan sa PIA Romblon, sinabi ni DTI Romblon Provincial Director Orville Mallorca na nakikita ng ahensya ang benepisyo ng paggamit ng digital payment system sa mga pamilihan, lalo na sa pagpapadali ng transaksyon ng mga mamimili at nagtitinda.
Katuwang ng DTI at Local Government Unit (LGU) ng Calatrava sa pagpapatupad ng cashless payment system ang GCash, kung saan ginagamit ang QR Ph upang maisagawa ang mga transaksyon.
Ayon kay Mallorca, mismong LGU Calatrava ang nagsikap na maisulong ang digitalization ng kanilang palengke bilang bahagi ng mga hakbang upang gawing mas accessible ang cashless payment sa mga mamimili at tindero.
Sa pamamagitan ng sistema, maaari nang magbayad ang mga mamimili gamit ang QR Ph kahit sa pagbili ng mga pangunahing bilihin tulad ng isda at karne sa wet market.
Ang digital payment system ay nagbibigay-daan sa mga mamimili na hindi na kailangang maglabas ng pisikal na pera sa bawat transaksyon, habang nagbibigay naman sa mga nagtitinda ng karagdagang paraan upang makatanggap ng bayad.
