Isinagawa ngayong alas-2 ng hapon sa Romblon Provincial Hospital (RPH) ang 3rd Quarter National Simultaneous Earthquake Drill (NSED) bilang bahagi ng patuloy na paghahanda ng mga kawani at health workers sa posibleng pagyanig at iba pang emergency situation.
Pinangunahan ang aktibidad ng Office of Civil Defense MIMAROPA katuwang ang iba't ibang Disaster Risk Reduction and Management Offices ng mga lokal na pamahalaan at pamahalaang panlalawigan.
Layunin ng aktibidad na masubok ang kahandaan ng ospital at mga tauhan nito sa pagtugon sa isang lindol, partikular sa mabilis at maayos na paglikas ng mga pasyente, healthcare workers at iba pang taong nasa loob ng pasilidad.
Sa isinagawang drill, isinabuhay ang mga kinakailangang hakbang sa panahon ng lindol, kabilang ang “Duck, Cover, and Hold” at maayos na paglikas sa itinalagang evacuation area matapos ang simulated earthquake.
Ang aktibidad ay bahagi ng nationwide earthquake preparedness initiative na isinasagawa upang mapalakas ang kamalayan at kahandaan ng publiko laban sa posibleng epekto ng malalakas na lindol.
