Nagtatag ng partnership ang San Andres National High School–Special Program in Journalism (SANHS-SPJ) at Romblon News Network (RNN) upang palakasin ang kasanayan at exposure ng mga student journalist sa aktuwal na pamamahayag.
Pormal na nilagdaan ang Memorandum of Agreement (MOA) nitong September 25 sa San Andres, Romblon.
Sa ilalim ng partnership, maaaring magsumite ang The Bridge at mga kwalipikadong student journalist ng mga news article, feature story, opinion piece at iba pang angkop na journalistic materials sa RNN para sa posibleng publication, na daraan sa editorial review at fact-checking ng news organization.
Ayon kay Paul Jaysent Fos, founder at senior news editor ng RNN, malaking bagay ang partnership sa pagitan ng paaralan at RNN dahil magbibigay ito ng dagdag na pagkakataon sa mga estudyante na mahasa ang kanilang kakayahan sa pagsusulat at iba pang aspeto ng journalism, habang nagkakaroon din sila ng exposure sa aktuwal na professional work.
Aniya, makatutulong ang exposure sa isang aktuwal na news organization upang mas maunawaan ng mga campus journalist ang proseso ng news writing, reporting, research, interviewing, editing at iba pang gawain sa pamamahayag.
Welcome development naman para sa San Andres National High School ang partnership, ayon kay Head Teacher Ric Marco Dalisay, lalo na para sa mga estudyante ng Special Program in Journalism.
Bahagi rin ng kasunduan ang pagbibigay ng editorial feedback at, kung naaangkop, recommendations sa mga isusumiteng materyal, habang mananatili sa RNN ang editorial authority sa pagtanggap, pag-edit at paglalathala ng mga isinumiteng artikulo. Hindi rin awtomatikong nangangahulugan ang submission na mailalathala ang isang materyal.
Nilagdaan din ang kasunduan ni Joziah Madeja, editor ng The Bridge, at ni Jeric Costales bilang School Paper Adviser.
Samantala, nakasaad sa MOA na layunin ng partnership na maisulong ang responsible journalism at mabigyan ang mga student journalist ng makabuluhang praktikal na karanasan sa news writing, reporting, research, interviewing, fact-checking at editing.
Discussion about this post