Mahigpit na nagbabala ang Romblon Police Provincial Office (PPO) laban sa paggamit ng mga pekeng driver’s license at pagtangkilik sa mga fixer, kasunod ng mga naitalang motorista na nahuhuling may hawak na mga huwad na dokumento sa mga isinagawang checkpoint sa lalawigan.
Sa isinagawang Traditional Monday Flag Raising Ceremony sa bayan ng Alcantara, binigyang-diin ni PCPT Von Edades, Officer-in-Charge ng Alcantara Municipal Police Station (MPS), sa harap ng mga kawani ng lokal na pamahalaan ang seryosong legal na epekto ng paggamit o pagmamay-ari ng pekeng dokumento.
Ayon kay Edades, maaaring arestuhin at sampahan ng kasong Falsification of Public Documents ang sinumang mahuhuling gumagamit o nagmamay-ari ng pekeng driver’s license.
Batay sa impormasyong ibinahagi ng pulisya, ang naturang paglabag ay may kaakibat na parusang pagkakakulong mula dalawang taon, apat na buwan at isang araw hanggang anim na taon, bukod pa sa multang maaaring umabot sa ₱100,000.
Napag-alaman din na marami pa ring motorista ang walang sapat na kaalaman hinggil sa mabigat na kaparusahan na maaaring kaharapin dahil sa paggamit ng pekeng lisensya.
Sa mga nakaraang checkpoint sa lalawigan, ilang nahuling motorista ang kusa namang nagsuko ng kanilang mga pekeng lisensya at nangakong daraan na sa tamang proseso upang makakuha ng lehitimong dokumento.
Dahil dito, hinimok ng Romblon PPO ang publiko na huwag gumamit ng anumang shortcut sa pagkuha ng driver’s license at sa halip ay sumunod sa opisyal na proseso ng pamahalaan.
Iginiit ng kapulisan na ang pagkakaroon ng lehitimong driver’s license ay hindi lamang usapin ng pagsunod sa batas kundi bahagi rin ng responsableng paggamit ng kalsada.
