Pinalalakas ng Lokal na Pamahalaan ng Odiongan ang pagpapatupad ng mga batas at ordinansa laban sa illegal fishing sa pamamagitan ng pagbuo ng Samahang Laban sa Pangisdang Bawal (SALAPANGBA).
Ayon kay Municipal Agriculturist Engr. Joel Fadero, ibinahagi niya ang inisyatiba sa isinagawang Kapihan sa PIA Romblon, kung saan binuo ang SALAPANGBA bilang grupo ng iba't ibang ahensya ng pamahalaan na nagtutulungan sa pagpapatupad ng mga ordinansa at national laws kaugnay ng pangisdaan.
Kabilang sa mga ahensyang kasapi nito ang Bureau of Fisheries and Aquatic Resources (BFAR), Philippine Coast Guard (PCG), Maritime Police, Odiongan Municipal Police Station at Municipal Agriculture Office.
Layunin ng grupo na mapalakas ang enforcement laban sa mga ipinagbabawal na paraan ng pangingisda at matiyak ang pagsunod sa mga umiiral na batas pangisdaan sa municipal waters ng Odiongan.
Ayon kay Fadero, mahalaga ang koordinasyon ng iba't ibang ahensya upang maprotektahan ang yamang-dagat ng bayan at matulungan din ang mga mangingisda na pangalagaan ang mga marine protected areas.
Nabuo ang SALAPANGBA noong 2023, at target ng mga ahensyang bumubuo rito na mapalawak ang inisyatiba at maging provincial-wide upang mas mapalakas ang kampanya laban sa illegal fishing sa buong Romblon.
Dagdag ni Fadero, mula nang mabuo ang SALAPANGBA ay kumaunti na umano ang mga iligal na nangingisda sa municipal waters ng Odiongan.
Patuloy naman ang koordinasyon ng mga miyembrong ahensya upang mapanatili ang proteksyon sa yamang-dagat at maisulong ang responsableng pangingisda sa bayan.
Discussion about this post