Magkapatid na ang mga lokal na pamahalaan ng Lungsod ng Mandaluyong at ng nayan ng Corcuera sa Romblon matapos pagtibayin ito sa bisa ng isang sisterhood agreement.
Nilagdaan ang kasunduan nina Mandaluyong Mayor Menchie Abalos at Vice Mayor Anthony Suva, kasama sina Corcuera Mayor Elmer Fruelda at Vice Mayor Aubrey Fondevilla, sa ginanap na programa sa Mandaluyong nitong Lunes, September 14.
Bilang bahagi ng pagbuo ng bagong ugnayan, nagpalitan din ng mga natatanging regalo ang dalawang lokal na pamahalaan bilang sagisag ng kanilang pagkakaibigan at pagkakaisa, gayundin ng kani-kanilang kultura, pagkakakilanlan at kasaysayan.
Inaasahang magsisilbing daan ang Sisterhood Agreement upang higit pang mapalakas ang ugnayan at pagtutulungan ng Mandaluyong at Corcuera sa pamamagitan ng pagbabahagi ng kaalaman, mga programa at best practices, pati na rin ng mga oportunidad na maaaring makatulong sa patuloy na pag-unlad ng kanilang mga komunidad.
Layunin din ng kasunduan na palawakin ang mga oportunidad para sa kapwa lokal na pamahalaan sa pamamagitan ng pagtutulungan at pagpapalitan ng mga karanasan sa pamamahala at paghahatid ng serbisyo publiko.
Discussion about this post