Isinulong ni Romblon Governor Trina Firmalo-Fabic at naaprubahan ng Regional Development Council, Regional Peace and Order Council, at Regional Task Force to End Local Communist Armed Conflict, ang ilang panukala na nakatuon sa pagpapahusay ng sistema ng social protection, kaligtasan ng mga mag-aaral, air connectivity at pagdaragdag ng mga prayoridad na proyekto para sa Romblon at Marinduque.
Isa sa mga pangunahing inisyatiba ni Fabic ang pagsusulong ng isang national initiative para pag-isahin ang iba’t ibang database at citizens information systems ng pamahalaan.
Sa pamamagitan ng isang resolusyong ipinapanukalang isumite sa Office of the President sa pamamagitan ng Presidential Management Staff, nais na magkaroon ng comprehensive at integrated database na interoperable o maaaring magamit ng iba’t ibang ahensya ng gobyerno at mga LGU. Kabilang sa mga database na nais pag-ugnayin ang CBMS, Listahanan, 4Ps, PhilSys o National ID System, Registry of Barangay Inhabitants and Migrants (RBIM), FishR, RSBSA at database ng senior citizens, bukod sa iba pa.
Ayon kay Fabic, magkakahiwalay at hindi magkakapareho ang ilang datos sa kasalukuyang mga sistema kaya kinakailangan ang mas maayos na integration upang maging mas episyente ang paggamit ng impormasyon sa paghahatid ng mga serbisyo ng pamahalaan.
Bilang chairperson ng Social Development Committee (SDC), itinulak din ng gobernador ang pag-adopt ng inter-agency engagement framework at strategic interventions para sa school safety at learner protection sa MIMAROPA.
Layunin nitong palakasin ang koordinasyon ng DepEd, LGUs, PNP at iba pang law enforcement agencies sa pagpapatupad ng mga hakbang para sa kaligtasan ng mga mag-aaral.
Isinulong din ni Fabic sa RDC ang inisyatiba ng DSWD MIMAROPA at PSA MIMAROPA na maisama ang mga benepisyaryo ng iba’t ibang social protection programs sa CBMS at National ID System.
Sa usapin naman ng air connectivity, ipinag-utos ni Fabic sa Secretariat ang pagkolekta at pag-compile ng datos ng air tourism arrivals sa MIMAROPA noong 2024, 2025 at 2026. Layunin nitong masukat batay sa aktuwal na datos kung nagkaroon ng epekto sa turismo at ekonomiya ng rehiyon ang polisiya kung saan ang mga propeller aircraft na may rutang MIMAROPA ay hindi na gumagamit ng NAIA at sa halip ay sa Clark nagmumula o lumalapag.
Maaari umanong magsilbing batayan ang datos sa kahilingan kay Department of Transportation Secretary Lopez na payagan ang mga eroplanong may ruta sa MIMAROPA na muling makapag-landing sa NAIA o Sangley Airport.
Iniulat din ni Fabic na napagbigyan ang hiling na madagdagan ang mga priority projects ng Romblon at Marinduque sa 2028 Agency Regional-National Investment Projects (ARNIPs), na binubuo ng mga malalaking proyektong prayoridad para sa pagpopondo sa 2028 national budget.
Ayon sa gobernador, patuloy niyang isusulong ang mga hakbang na makatutulong sa pag-unlad ng Romblon at ng buong MIMAROPA.
