Maagang natapos ang kampanya ng Gilas Pilipinas Men’s Basketball Team sa Nagoya Asian Games 2026 matapos mabigong umabante sa quarterfinal round.
Nagtapos ang Gilas sa group stage na may isang panalo at dalawang talo. Sa kanilang unang laro, natalo sila sa Bahrain, 89–85. Bumawi naman ang koponan sa ikalawang laro matapos talunin ang Kazakhstan, 109–78, ngunit sa kanilang ikatlong laro ay natalo sila sa China, 105–61.
Naging mahalaga sa kanilang pagpasok sa quarterfinal round ang naging resulta laban sa China. Sa 44-point deficit ng Gilas, hindi nila nakuha ang kinakailangang standing upang makasulong sa susunod na round, kung saan Bahrain ang nakakuha ng puwesto.
Mas naging kapansin-pansin ang resulta dahil ang Gilas Pilipinas ang defending champion sa Asian Games basketball. Noong 2023 Hangzhou Asian Games sa China, tinalo ng Gilas ang Jordan upang makuha ang gintong medalya—ang unang gold medal ng Pilipinas sa men’s basketball sa Asian Games matapos ang 61 taon.
Hindi kasama sa kasalukuyang lineup ng Gilas si Justin Brownlee, na naging bahagi ng koponang nagkampeon noong 2023. Hindi rin isinama ang ilang regular na mainstay at All-PBA players sa delegasyon para sa 2026 Asian Games.
Kabilang sa roster sina RJ Abarrientos, Jerrick Ahanmisi, Justin Arana, Justin Baltazar, Sedrick Barefield, Brandon Bates, Robert Bolick, Brandon Ganuelas-Rosser, Zavier Lucero, Adrian Nocum, Calvin Oftana at Don Trollano. Pinamunuan ang koponan ni Tim Cone bilang head coach.
Sa kasaysayan ng Philippine basketball sa Asian Games, ang huling All-PBA Team na nakakuha ng medalya ay ang RP Centennial Team noong 1998, kung saan nakamit ng Pilipinas ang bronze medal. Si Tim Cone rin ang naging head coach ng nasabing koponan.
Discussion about this post