Nagkampeon sina Alexander Zverev ng Germany sa Men’s Division at Elena Rybakina ng Kazakhstan sa Women’s Division sa katatapos na US Open Tennis Tournament 2026 na ginanap mula Agosto 30 hanggang Setyembre 13, 2026 sa Queens, New York at nilaro sa hardcourt surface.
Nakuha ni Zverev ang kanyang ikalawang Grand Slam title matapos talunin sa finals ang American na si Ben Shelton sa apat na sets, 6–3, 7–6, 5–7, 6–2. Nauna nang nagkampeon si Zverev sa French Open ngayong taon at nakaabot din sa finals ng Wimbledon bago natalo kay Jannik Sinner.
Bago makarating sa finals, tinalo ni Zverev sina Lorenzo Sonego ng Italy, Quentin Halys ng France, Alejandro Tabilo ng Chile, Luciano Darderi ng Italy, Botic van de Zandschulp ng Netherlands at Karen Khachanov ng Russia.
Para naman kay Shelton, ito ang unang pagkakataon na umabot siya sa Grand Slam final.
Sa Women’s Division, tinalo ni Rybakina si Aryna Sabalenka ng Belarus sa finals, 6–4, 5–7, 6–2. Ito na ang kanyang ikatlong Grand Slam title matapos ang kanyang mga kampeonato sa Wimbledon 2022 at Australian Open 2026.
Dumaan si Rybakina kina Thea Frodin ng USA, Jessica Bouzas Maneiro ng Spain, Yuliia Starodubtseva ng Ukraine, Naomi Osaka ng Japan, Zheng Qinwen ng China at Coco Gauff ng USA bago makarating sa finals.
Samantala, umabot naman hanggang third round ang Filipina tennis star na si Alex Eala.
Sa unang round, tinalo ni Eala si Mary Stoiana ng USA, 6–1, 6–2, bago niya daigin si Oleksandra Oliynykova ng Ukraine sa second round, 6–1, 6–4.
Sa third round, nagtapos ang kampanya ni Eala matapos siyang talunin ni Iva Jovic sa tatlong sets, 5–7, 6–3, 5–7.
Discussion about this post