Umakyat sa 41 job seekers ang na-hire on the spot (HOTS) sa Trabaho Agad Job Fair na isinagawa noong September 14 sa Odiongan, Romblon, bilang bahagi ng nationwide Handog ng Pangulo: Serbisyong Sapat Para sa Lahat 2026.
Umabot sa 282 job seekers ang lumahok sa job fair na isinagawa ng Department of Labor and Employment (DOLE) MIMAROPA, sa pamamagitan ng DOLE Romblon Field Office, para sa direktang employment matching sa pagitan ng mga aplikante at mga kumpanyang naghahanap ng manggagawa.
Pinakamarami sa mga na-hire ang tinanggap ng CARD Bank/CARD Inc., na kumuha ng 25 aplikante, habang pitong job seekers naman ang natanggap ng Home Credit.
Apat naman ang na-hire ng Taytay sa Kauswagan, Inc. (TSKI), habang tatlo ang tinanggap ng El Elohe, kabilang ang isang Service Crew.
Dalawa naman ang na-hire ng Romblon State University (RSU) Utilities, na bumuo sa kabuuang 41 job seekers na nakakuha agad ng trabaho sa isinagawang job fair.
Sa pamamagitan ng pakikipagtulungan ng DOLE sa mga lokal na negosyo at institusyon, layunin ng job fair na mapalapit ang mga naghahanap ng trabaho sa mga potensyal na employer at mapadali ang proseso ng job placement.
Bahagi rin ito ng patuloy na pagsisikap ng DOLE MIMAROPA na palakasin ang employment opportunities sa Romblon, mabawasan ang mga hadlang sa paghahanap ng trabaho, at makatulong sa pagpapatatag ng workforce at paglago ng lokal na ekonomiya.
