Nasira ang ilang bahagi ng flood control structures sa mga bayan ng Odiongan at Looc, Romblon kasunod ng malakas na pag-ulan at pagragasa ng tubig-baha na dala ng Habagat noong Sabado, August 8.
Sa Sitio Bulabog, Barangay Tulay, Odiongan, nasira ang bahagi ng flood control structure matapos ang malakas na agos ng tubig-baha kahapon.
Ayon sa residenteng si Eden Forteza, malapit sa mga kabahayan ang nasirang bahagi ng istruktura kaya nangangamba ang mga residente sa posibleng epekto nito sakaling muling tumaas ang tubig sa lugar.
Sinabi naman ni Barangay Captain Christian Diva na ipararating niya sa mga kinauukulang tanggapan ang insidente upang maisagawa ang kinakailangang aksyon.
Samantala, nasira rin ang isang bahagi ng flood control project sa Barangay Pili, Looc, matapos hampasin ng malakas na agos ng ilog kasabay ng buhos ng ulan dulot ng Habagat.
Ayon kay Marilyn Castillo, ikinababahala ng mga residente ang posibleng epekto ng pagkasira ng istruktura sa mga kabahayan at komunidad, lalo na kung muling makararanas ng malakas na pag-ulan at pagtaas ng tubig sa ilog.
Isang residente rin ng Barangay Batiano ang nagpadala ng mga larawan na may nasirang proyekto rin sa kanilang barangay dahil sa masamang panahon.
Nanawagan ang mga residenteng malapit sa mga nasirang proyekto na sana ay maayos agad para hindi maging dagdag problema kung sakaling muling umulan.
Discussion about this post