Inilabas na ng Sunlight Air ang opisyal nitong base fare para sa mga biyaheng Clark-Tablas at Tablas-Clark, kasabay ng nalalapit na paglulunsad ng direktang flight sa pagitan ng Clark International Airport at Tugdan Airport sa Tablas Island, Romblon.
Batay sa fare matrix na inilabas ng airline, nagsisimula sa ₱1,899 ang Lite base fare para sa one-way flight. Kabilang sa Lite fare ang 7-kilogram carry-on baggage allowance at rebooking na may kaukulang bayad.
Limitado lamang ang bilang ng upuan na inaalok sa Lite fare, kaya maaaring hindi ito available sa lahat ng flight o booking date.
Ang regular na Value fare ay nagsisimula sa ₱7,299. May kasama itong 10-kilogram checked baggage allowance at isang beses na libreng rebooking hanggang 72 oras bago ang flight.
Samantala, ang Plus fare ay nagsisimula sa ₱7,799, na may 20-kilogram checked baggage allowance, priority check-in at boarding, libreng standard seat selection, at unlimited rebooking nang walang bayad hanggang 72 oras bago ang nakatakdang biyahe.
Mahalagang tandaan na ang ₱1,899 ay base fare lamang at hindi pa kasama ang mga buwis, airport charges, at iba pang naaangkop na bayarin, kaya maaaring mas mataas ang kabuuang halaga ng tiket depende sa booking.
Inaasahang magbibigay ang bagong Clark-Tablas route ng mas mabilis na koneksyon sa pagitan ng Central Luzon at Romblon, na makatutulong sa pagpapalakas ng turismo, kalakalan, at accessibility ng lalawigan.
Discussion about this post