Malaking ginhawa sa operasyon ng ice plant para sa mga mangingisda sa San Agustin ang bagong solar energy system na tutulong na mapababa ang mataas na gastos sa kuryente ng pasilidad.
Ayon kay Barangay Captain Claro M. Madrilejos III ng Barangay Carmen, kung saan matatagpuan ang ice plant, malaking tulong na ang pasilidad sa mga mangingisda at maliliit na negosyante dahil nagbibigay ito ng abot-kayang yelo para mapanatiling sariwa ang kanilang mga huling isda.
Ang ice plant ay itinatag ng Department of Science and Technology (DOST)-MIMAROPA at ng Local Government Unit (LGU) ng San Agustin sa Marine Fish Landing Center sa Carmen Bay. Ang one-tonner ice plant ay may kapasidad na gumawa ng 25 hanggang 30 bloke ng yelo kada batch, na bawat isa ay humigit-kumulang 15 kilo.
Ang pasilidad ay may 30-tonner cooling tower, 7-horsepower compressor, 5-tonner condenser, 5-tonner evaporator, 2-tonner water tank, agitator at ice crusher. Inilaan naman ng LGU-San Agustin ang lupa, gusali at kinakailangang electrical system para sa pasilidad.
Mahalaga ang ice plant sa tinatayang 2,038 rehistradong mangingisda sa San Agustin dahil dati ay kailangan pa nilang bumiyahe sa ibang lugar upang makakuha ng yelo, na nagdudulot ng karagdagang gastos at pagkatunaw ng yelo habang dinadala sa kanilang mga lugar.
“Yung isda, sa halip na mahal ang bentahan, pero pagdating sa tabi, nagiging mura, kaya ito ang ginawan ng paraan ni dating Mayor Denon Madrona wayback 2023, nakipagpulong at humingi ng tulong, kasama si Congressman Budoy Madrona, at nakapagpatayo ng ice plant ang ating DOST,” ani Madrilejos.
Gayunman, sinabi niyang naging malaking hamon sa pagpapatakbo ng pasilidad ang mataas na konsumo sa kuryente.
“Malaking tulong ito sa aming mga mangingisda, maging sa aming mga maliliit na negosyante. Nga lamang, mabigat ding pasanin sa amin ang mahal na singil na kuryente kasi halos 8,000 watts per hour, kaya ang tendency, ang kita, napupunta lang sa kuryente,” ani Madrilejos.
Dahil dito, malaking tulong umano ang bagong Solar Energy System (SES) na inilagay sa ice plant upang makatulong sa operational expenses nito.
Ang bagong solar intervention ay may project cost na ₱2.186 milyon at binubuo ng 16-kVA solar hybrid energy system na may 80-kWh battery storage, na idinisenyo upang magbigay ng renewable energy support sa operasyon ng ice plant.
“Malaking blessing ito dahil ngayon may solar power na ang ating ice plant, malaking tulong ito para mapunan ang operational expenses habang pinatatakbo namin ang ice plant,” dagdag ni Madrilejos.
Bukod sa pagbawas sa gastusin, inaasahang makatutulong ang kombinasyon ng ice plant at solar energy system upang maging mas sustainable ang serbisyo para sa fisheries sector at mapanatili ang kalidad at market value ng mga huling isda.
Sinabi ni Madrilejos na pananatilihin nilang maayos ang operasyon at pamamahala ng pasilidad bilang pasasalamat sa DOST, lokal na pamahalaan at mga naging katuwang sa pagtatayo at pagpapalakas nito.
“Bilang balik pasasalamat sa DOST, sa ating mayor, kay Mayor Denon, at sa mahal na congressman, amin pong patatakbuhin ito nang maayos at pamamahalaan para maging sustainable ang pamumuhay ng mga mangingisda namin dito sa San Agustin maging sa mga kalapit bayan,” ani Madrilejos.
Bukod sa pakinabang ng mga lokal na mangingisda, inaasahang makatutulong ang ice plant sa paghikayat sa mga mangingisda mula sa mga kalapit na bayan na mag-landing ng kanilang huli sa Carmen Fish Landing Center, na maaaring magpalakas sa lokal na ekonomiya.
