Pormal nang sinimulan ng Sangguniang Panlalawigan ng Romblon ang hakbang tungo sa digitalization matapos lumagda sa isang kasunduan sa Faalam Software Development Services para sa pagpapatupad ng cloud-based digital system sa tanggapan.
Pinangunahan ni Vice Governor Armando Gutierrez ang paglagda sa kasunduan kasama si Jayvee Faalam Molino ng Faalam Software Development Services.
Sa ilalim ng proyekto, magkakaroon ng online at centralized database na magagamit ng mga miyembro at kawani ng Sangguniang Panlalawigan para sa mas mabilis na pag-access sa mga ordinansa, resolusyon, minutes of meetings, at iba pang mahahalagang dokumento at records.
Layunin nitong mabawasan ang paggamit ng papel at unti-unting maisakatuparan ang paperless na proseso sa mga gawain ng lokal na lehislatura. Sa pamamagitan ng sistema, mas mapapadali rin ang pag-iimbak, paghahanap at pagbabahagi ng mga dokumento sa mga awtorisadong user.
Ayon kay Gutierrez, matagal nang pinag-uusapan ang digitalization ng tanggapan at inaasahang maipatutupad na ang sistema sa mga susunod na buwan.
“We are trying our best to improve and make it faster, as far as work is concerned. Just like any other government agencies nowadays, they are also moving to digitalization. Here in the Sangguniang Panlalawigan, under my watch, this has been discussed noon pa, and we are glad finally we are here,” ani Gutierrez.
Inaasahan din aniya na makatutulong ang proyekto upang mapabilis at higit pang mapabuti ang mga proseso sa loob ng Sangguniang Panlalawigan.
Bukod sa pagpapabilis ng trabaho, inaasahan ding makababawas ang digital system sa gastusin ng tanggapan, partikular sa pagbili ng coupon bond, printing materials at iba pang office supplies.
“Everything will become computerized. It is one way of trying to save cost also. Initial investment lang naman, pero in the long run makakatipid talaga ang gobyerno,” dagdag ng vice governor.
Ayon kay Gutierrez, ang inisyatiba ay inaasahang magiging kauna-unahang ganitong digitalization project sa mga Sangguniang Panlalawigan sa buong MIMAROPA.
Binigyang-diin din niya ang kahalagahan ng pagbibigay ng pagkakataon sa mga lokal na IT professionals at consultants sa pagpapatupad ng mga proyekto ng pamahalaan.
“Good news na local na ang gumagawa ng ganito. As much as possible, we give priority to them kasi maganda dahil kilala na nila ang Romblon, alam na nila ang system at mas madali ang communication,” aniya.
Sinabi ni Gutierrez na ang digitalization project ay bahagi lamang ng mas malawak na pagsisikap ng pamahalaang panlalawigan, sa ilalim ng pamumuno ni Governor Trina Firmalo-Fabic, na patuloy na mapahusay ang mga serbisyo at proseso ng pamahalaan sa pamamagitan ng paggamit ng teknolohiya.
Discussion about this post