Nagbibigay ng pagkakataon ang Sangguniang Panlalawigan ng Romblon sa mga lokal na information technology professionals na maging bahagi ng digital transformation ng pamahalaan, kasabay ng pagpapatupad nito ng cloud-based system para gawing moderno ang mga proseso sa lokal na lehislatura.
Ayon kay Vice Governor Armando Gutierrez, ang pakikipagtulungan ng Sangguniang Panlalawigan sa isang lokal na software developer ay nagpapakita ng kakayahan ng mga IT professionals sa Romblon na makapagbigay ng mga teknolohikal na solusyon para sa mga tanggapan ng pamahalaan.
Kamakailan ay lumagda sa kontrata ang Sangguniang Panlalawigan at ang Faalam Software Development Services, sa pangunguna ni Jayvee Faalam Molino, para sa pagbuo at pagpapatupad ng cloud-based digital system.
Sa ilalim ng proyekto, magtatatag ng online at centralized database na magbibigay-daan sa mga awtorisadong miyembro at kawani na mas madaling ma-access ang mga ordinansa, resolusyon, minutes of meetings at iba pang mahahalagang legislative records.
“Good news na local na ang gumagawa ng ganito,” ani Gutierrez.
Binigyang-diin ng vice governor ang kahalagahan ng paghikayat sa mga lokal na IT consultants na mag-develop at mag-upgrade ng mga technology solutions na maaari ring maialok sa iba pang ahensya ng pamahalaan.
“As much as possible, we give priority to them kasi maganda dahil kilala na nila ang Romblon, alam na nila ang system, alam na nila anong meron dito. It's easy to communicate,” ani Gutierrez.
Ayon sa kanya, may kalamangan ang mga lokal na technology professionals dahil mas pamilyar sila sa kalagayan ng lalawigan at sa mga umiiral na sistema, na makatutulong sa mas madaling koordinasyon at pagbuo ng mga solusyong tumutugon sa lokal na pangangailangan.
Umaasa rin si Gutierrez na mas marami pang lokal na IT consultants ang mabibigyan ng pagkakataong makapagbigay ng kanilang serbisyo sa mga institusyon ng pamahalaan habang patuloy na lumalawak ang paggamit ng digital technology.
Bahagi ang proyekto ng mas malawak na hakbang ng Sangguniang Panlalawigan upang gawing moderno ang operasyon nito, mabawasan ang paggamit ng papel at mapadali ang access sa mahahalagang dokumento ng lokal na lehislatura.
