Naglabas ng opisyal na babala ang Romblon State University (RSU) matapos makatanggap ng mga ulat tungkol sa isang indibidwal na umano’y nagpapakilalang Joemarie A. Cortez at ginagamit ang mobile number na 0912 233 9216 upang makipag-ugnayan sa mga supplier at stakeholder sa labas ng komunidad ng unibersidad.
Sa isang pahayag ng Office of the University President noong Agosto 28, nilinaw ng RSU na si Cortez ay hindi kawani, empleyado, o awtorisadong kinatawan ng tanggapan.
Ayon sa unibersidad, walang awtoridad mula sa Office of the President ang anumang komunikasyon, kahilingan, solicitation, o transaksyon na ginagawa sa ilalim ng naturang pagpapakilala.
Binigyang-babala rin ang publiko na huwag tumugon, magbigay ng personal na impormasyon, magpadala ng pera, o pumasok sa anumang transaksyon kung makatanggap ng mensahe, tawag, kahilingan o alok mula sa naturang indibidwal o mobile number na nagsasabing may kaugnayan ito sa Office of the President.
Hinimok naman ng RSU ang publiko na beripikahin ang lahat ng komunikasyon sa pamamagitan ng mga opisyal na communication channels ng unibersidad at agad i-report sa mga kinauukulang awtoridad ang anumang kahina-hinalang mensahe o hindi awtorisadong pagpapakilala.
