Nilinaw ng Department of Environment and Natural Resources (DENR) na ang iminungkahing mining area ng Altai Philippines Mining Corp. sa Sibuyan Island, Romblon ay nasa labas ng Mt. Guiting-Guiting Natural Park, batay sa mga rekord ng ahensya.
Ayon kay Mines and Geosciences Bureau (MGB) MIMAROPA Regional Director Felizardo Gacad Jr., hindi sakop ng protected area ang lugar na tinutukoy para sa mining project.
Iniulat ito ng Philippine News Agency (PNA) kasunod ng mga usapin kaugnay ng mining project ng Altai sa Sibuyan Island.
Gayunman, sinabi ni Gacad na kung umabot ang proyekto sa Declaration of Mining Project Feasibility stage, kinakailangan pa ring sumunod ang kumpanya sa iba pang environmental requirements, kabilang ang pagkuha ng Environmental Compliance Certificate (ECC).
Kailangan din umanong magsagawa ng environmental impact assessment upang matukoy ang posibleng epekto ng proyekto sa mga river system, trails at iba pang environmental concerns sa lugar.
Ang Mt. Guiting-Guiting at mga nakapaligid na lupain sa Sibuyan Island ay idineklarang protected natural park noong 1996 sa ilalim ng Proclamation No. 746.
Saklaw ng Mt. Guiting-Guiting Natural Park ang tinatayang 15,265 ektarya sa mga bayan ng Cajidiocan, Magdiwang at San Fernando.
Patuloy namang nakabinbin ang mga kinakailangang proseso at pagsusuri bago maaaring umusad ang anumang mining project sa lugar, alinsunod sa mga umiiral na batas at regulasyon sa pagmimina at pangangalaga sa kapaligiran.
