Nagpakita ng pagbaba sa bilang ng mga naitatalang aksidente sa kalsada sa Romblon ang pagpapatupad ng Project Ligtas Kalsada ng Romblon Police Provincial Office (RPPO), ayon sa datos ng kanilang Road Crash Monitoring Report.
Batay sa ulat, 13 road crash incidents na may kaugnayan sa 22 kaso ang naitala noong Hulyo 2026. Mula naman Agosto 1 hanggang 22, bumaba ito sa pitong road crash incidents at 11 kaso, matapos ilunsad at ipatupad ang programa.
Inilunsad ang Project Ligtas Kalsada noong Hulyo 2, 2026 sa ilalim ng temang “Disiplina sa Daan, Kaligtasan ng Mamamayan.”
Ayon sa RPPO, kabilang sa mga hakbang na isinagawa sa ilalim ng programa ang pinaigting na checkpoint operations, deputization ng mga tauhan ng Philippine National Police ng Land Transportation Office upang tumulong sa pagpapatupad ng mga batas trapiko, information campaign sa social media, pamamahagi ng flyers, at pakikipagdayalogo sa mga motorista, transport groups at mga komunidad.
Ayon kay PCOL Rexton F. Sawi, Provincial Director ng Romblon PPO, mahalaga ang pakikiisa ng mga motorista at mamamayan sa pagpapanatili ng kaligtasan sa mga lansangan.
“Ang pagbaba ng bilang ng road crash incidents ay patunay na ang disiplina sa kalsada at aktibong pakikipagtulungan ng ating mga mamamayan ay may malaking epekto sa kaligtasan ng bawat isa,” ani Sawi.
Dagdag niya, patuloy pang paiigtingin ng Romblon PPO ang pagpapatupad ng Project Ligtas Kalsada sa pamamagitan ng enforcement, information campaigns at pakikipag-ugnayan sa iba't ibang sektor.
Hinimok naman ng RPPO ang mga motorista at iba pang road users na maging responsable sa paggamit ng kalsada at sumunod sa mga batas trapiko upang makatulong sa pagpapanatili ng kaligtasan sa buong lalawigan.
