Nagbahagi ng kaalaman at praktikal na karanasan sa photojournalism si PIA Romblon Government Information Center Coordinator Paul Jaysent Fos sa mga student journalist ng Philippine Science High School–MIMAROPA Region Campus sa isinagawang JournCamp 1.0 ngayong araw.
Si Fos ang nagsilbing resource speaker para sa photojournalism session ng aktibidad na inorganisa ng PUSOR, ang official student publication ng PSHS-MIMAROPA Region Campus.
Tinalakay ni Fos ang mga pangunahing konsepto sa photojournalism, kabilang ang kahalagahan ng pagkukuwento sa pamamagitan ng larawan, tamang pagpili ng subject, composition, timing at pagbibigay ng sapat na konteksto sa bawat kuha.
Binigyang-diin din niya na ang isang mahusay na news photograph ay hindi lamang dapat maganda sa paningin, kundi kailangang makatulong sa mambabasa na maunawaan kung ano ang nangyari at kung bakit ito mahalaga.
Ibinahagi rin ni Fos ang kahalagahan ng katotohanan at etika sa pagkuha at paggamit ng mga larawan, lalo na sa campus journalism. Aniya, kailangang tiyakin ng mga student journalist na ang kanilang mga larawan ay tumpak, hindi mapanlinlang at hindi inilalagay sa alanganin ang dignidad at karapatan ng kanilang mga kinukuhanan.
Sa pamamagitan ng session, nabigyan ang mga kalahok ng praktikal na gabay na maaari nilang magamit sa kanilang campus publication, mula sa pag-cover ng mga aktibidad sa paaralan hanggang sa pagdodokumento ng mga isyung mahalaga sa kanilang komunidad.
Layunin ng JournCamp 1.0 na higit pang mapaunlad ang kaalaman at kasanayan ng mga student journalist sa pagsusulong ng responsable, makabuluhan at de-kalidad na campus journalism, alinsunod sa temang “Truth in Action.”
