Nakarekober ang pinagsanib na puwersa ng Provincial Environment and Natural Resources Office (PENRO)-Romblon at Odiongan Municipal Police Station (MPS) ng 36 piraso ng hinihinalang ilegal na pinutol na kahoy na nagkakahalaga ng ₱118,452.80 sa Sitio Centro, Barangay Progreso Weste, Odiongan, Romblon.
Isinagawa ang operasyon matapos makatanggap ng impormasyon mula sa isang concerned citizen hinggil sa mga iniwang troso sa lugar. Agad namang nagsagawa ng beripikasyon ang mga tauhan ng Odiongan MPS sa pamumuno ni PMAJ Dennis M. Rivera, Acting Chief of Police, kasama ang mga kawani ng PENRO-Romblon.
Sa operasyon, nakarekober ang mga awtoridad ng 36 pirasong Acacia sawn lumber na may kabuuang 1,480.66 board feet. Kabilang dito ang 10 pirasong may sukat na 2x50x8, 18 pirasong 2x50x5, at walong pirasong 4x4x6.
Sa kabila ng isinagawang follow-up operation, wala pang natutukoy na suspek o may-ari ng mga nakuhang troso. Dinala ang mga ito sa Recovery Containment Area sa Barangay Dapawan, Odiongan para sa tamang dokumentasyon at disposisyon alinsunod sa umiiral na batas pangkalikasan.
Patuloy naman ang imbestigasyon ng mga awtoridad upang matukoy ang mga responsable sa umano'y ilegal na pagputol ng kahoy.
Pinuri ni Romblon Police Provincial Director PCOL Rexton F. Sawi ang mabilis na koordinasyon ng PNP at PENRO-Romblon, gayundin ang pagiging mapagmatyag ng concerned citizen na nagbigay ng impormasyon na nagresulta sa matagumpay na recovery operation.
Discussion about this post