Mahigit isang daang barangay officials mula sa iba’t ibang barangay ng Odiongan ang nakiisa sa Barangayanihan sa Barangay Poctoy na naglalayong pagandahin ang paligid at palakasin ang pagkakaisa ng mga komunidad.
Kabilang sa isinagawang aktibidad ang sabay-sabay na pagpipintura ng seawall bilang bahagi ng community initiative para mapaganda ang baybayin at mga pampublikong lugar sa bayan.
Nakiisa rin sa aktibidad sina Congressman Eleandro “Budoy” Madrona, Mayor Roger Fodra at Vice Mayor Michael Arevalo, kasama ang mga miyembro ng Sangguniang Bayan ng Odiongan.
Ayon kay Barangay Captain Dina Dela Vega, isa sa mga lumahok sa aktibidad, layunin ng Barangayanihan na higit pang palakasin ang pagkakaisa ng mga barangay para sa patuloy na pag-unlad ng Odiongan.
“Layunin nito na palakasin at patatagin ang pagkakaisa para mapaunlad ang ating bayan ng Odiongan dahil kapag sama-sama at nagkakaisa, madaling mapaganda at mapaunlad ang ating bayan,” ani Dela Vega.
Inaasahang magpapatuloy ang mga community-based activity na naglalayong hikayatin ang mga opisyal at residente na sama-samang makibahagi sa pagpapaunlad at pagpapaganda ng kanilang mga komunidad.
Discussion about this post