Hinikayat ni Congressman Eleandro Jesus “Budoy” Madrona ang mga lokal na pamahalaan, stakeholders at mga residente ng Romblon na magtulungan upang mapanatili ang regular na operasyon ng Sunlight Air sa lalawigan.
Ayon kay Madrona, nakita niya ang pagkakaisa ng provincial government, mga alkalde at iba pang tourism stakeholders mula nang talakayin ang posibilidad ng pagbabalik ng commercial flights ng Sunlight Air sa Romblon.
Aniya, mahalagang mapanatili ang operasyon ng airline upang mas maraming turista, negosyo at national government agencies ang mahikayat na pumunta sa lalawigan.
“The more important thing is, how can we sustain this. Nandito kayo lahat, magtulungan tayo. Ipakita at ipaabot natin sa ating mga mamamayan na pagtulungan nating suportahan ang Sunlight Air,” ani Madrona.
Sinabi ng kongresista na malaking tulong ang direktang flight sa pagpapalakas ng turismo, lalo na para sa mga hotel, tourism destinations at iba pang negosyo sa lalawigan.
Dagdag pa niya, mas magiging madali rin para sa mga national government agencies at iba pang organisasyon na pumunta sa Romblon dahil mayroon nang mas mabilis na air connectivity.
Naniniwala si Madrona na ang pagbabalik ng flights ay maaaring magbigay ng mas malakas na tulak sa development ng lalawigan.
Binigyang-diin niya ang kahalagahan ng pagtutulungan ng lahat ng sektor upang mapanatili ang flight at mapakinabangan ng mga Romblomanon ang mga oportunidad na maaaring maidulot nito.
“Pagtulungan natin ito. Kapakanan na ng probinsya ang nakasalalay,” ani Madrona.
Binanggit din ni Madrona ang mga tourism destination na pinaglilingkuran ng Sunlight Air, gaya ng Siargao at El Nido, bilang mga halimbawa ng mga lugar na nakikinabang sa air connectivity at lumalakas ang turismo.
