Inaprubahan ng House of Representatives sa ikatlo at pinal na pagbasa ang House Bill No. 9609, isang panukalang batas na magbabalik sa Romblon Provincial Hospital (RPH) sa pangangasiwa ng pambansang pamahalaan sa pamamagitan ng Department of Health (DOH).
Ang panukala, na pangunahing inakda ni Romblon Lone District Rep. Eleandro Jesus “Budoy” Madrona, ay naglalayong i-revert sa national government ang pamamahala sa Romblon Provincial Hospital at maglaan ng kinakailangang pondo para sa operasyon at pagpapahusay ng mga serbisyong pangkalusugan nito.
Kapag naisabatas, ang RPH sa Odiongan ay direktang pamamahalaan ng DOH. Inaasahang magreresulta ito sa mas malaking pondo para sa pagpapaunlad ng mga pasilidad at kagamitang medikal, pagdaragdag ng mga doktor, nars, at iba pang healthcare workers, gayundin sa pagpapalawak ng serbisyong medikal para sa mga Romblomanon.
Nauna nang nagpahayag ng buong suporta si Romblon Governor Trina Alejandra Firmalo-Fabic sa panukalang renasyonalisasyon sa pagdinig ng Senate Committee on Health and Demography. Ayon sa gobernador, halos kalahati ng taunang badyet ng pamahalaang panlalawigan ang napupunta sa operasyon ng walong pampublikong ospital sa lalawigan, kung saan ang Romblon Provincial Hospital lamang ay kumokonsumo ng humigit-kumulang ₱235 milyon o halos 15 porsiyento ng kabuuang provincial budget para sa 2026.
May katapat na panukala rin sa Senado sa pamamagitan ng Senate Bill No. 2061, na inakda ni Sen. Camille A. Villar, na naglalayong ilagay ang Romblon Provincial Hospital sa ilalim ng direktang superbisyon at kontrol ng DOH.
Bago tuluyang maging batas, kailangan pang mapagkasundo ang bersyon ng Kamara at Senado, kung kinakailangan, bago ito isumite sa Pangulo para sa kanyang lagda.
