Umabot sa 18,000 residente sa mga island community sa MIMAROPA ang nabigyan ng mas ligtas at mas maaasahang access sa tubig sa pamamagitan ng 31 water technology projects na ipinatupad ng Department of Science and Technology (DOST), ayon kay Secretary Renato U. Solidum Jr.
Inilahad ni Solidum ang datos sa pagbubukas ng 2026 MIMAROPA Regional Science, Technology and Innovation Week (RSTW) sa Odiongan, Romblon noong Agosto 17.
Kabilang sa mga proyekto ang desalination systems, filtration facilities gaya ng SAFEWATRS, solar-powered water pumps, rainwater harvesting systems at hydraulic ram pumps na idinisenyo upang tugunan ang mga hamon sa suplay ng tubig sa mga isla at geographically isolated communities.
“Access to safe water comes first because it is a basic human need across MIMAROPA,” ani Solidum.
Bahagi ang mga inisyatiba ng pagsisikap ng DOST na mailapit ang mga solusyong nakabatay sa science and technology sa mga komunidad, partikular sa mga lugar na nahaharap sa hamon sa access sa pangunahing serbisyo dahil sa kanilang lokasyon.
Binigyang-diin ni Solidum na dapat nakabatay sa aktuwal na pangangailangan ng mga komunidad ang pagbuo at paggamit ng mga teknolohiya.
“Technology should never be developed simply because it is new. It should be developed because it solves a problem,” aniya.
Ayon sa kalihim, kaakibat ang ganitong pamamaraan ng programa ng administrasyon ni Pangulong Ferdinand R. Marcos Jr. na nagtataguyod sa paggamit ng science, technology and innovation bilang kasangkapan para sa inklusibo at napapanatiling pag-unlad.
Ginanap ang 2026 RSTW mula Agosto 17 hanggang 19 sa Romblon, na nakatuon sa papel ng science, technology at digital innovation sa pagsusulong ng food security, sustainable energy at national resilience sa MIMAROPA.
Nagsisilbing host ang Romblon sa kauna-unahang sabayang pagdiriwang ng RSTW sa limang lalawigan ng rehiyon, kung saan nagsasagawa rin ng mga STI activity sa Occidental Mindoro, Oriental Mindoro, Marinduque at Palawan.
