Nagsagawa ang Department of Science and Technology (DOST) MIMAROPA ng serye ng paglulunsad at ceremonial awarding ng mga science, technology and innovation (STI) initiatives sa San Agustin, Romblon noong August 16, na naglalayong palakasin ang digital connectivity, sustainable energy, turismo at iba pang serbisyong pangkomunidad.
Dumalo sa aktibidad si DOST Secretary Renato U. Solidum Jr., kasama sina San Agustin Mayor Aaron James C. Madrona at Congressman Eleandro Jesus “Budoy” F. Madrona, gayundin ang iba pang opisyal ng DOST at Lokal na Pamahalaan ng San Agustin.
Kabilang sa mga tampok na proyekto ang Resilient Education Information Infrastructure for the New Normal (REIIN-LokalFi) sa Barangay Poblacion, isang teknolohiyang binuo ng DOST-ASTI na naglalayong magbigay ng matatag na access sa verified information at communication services kahit magkaroon ng internet disruption o kalamidad.
Sa ilalim ng proyekto, isang REIIN-LokalFi system ang ide-deploy sa bayan at sasailalim sa capacity-building at hands-on training ang hindi bababa sa 15 LGU personnel, MDRRMO personnel, community volunteers at iba pang stakeholders para sa system installation, operation, maintenance, content management at emergency communication protocols.
May kabuuang project cost na ₱1.053 milyon ang REIIN-LokalFi, na ipatutupad mula Marso 2026 hanggang Pebrero 2029.
Samantala, isinagawa sa Barangay Carmen ang ceremonial awarding ng Solar Energy System (SES) Mini Ice Plant Facility, na naglalayong gawing mas sustainable ang operasyon ng pasilidad na nagsisilbi sa lokal na sektor ng pangisdaan.
May kabuuang project cost na ₱2.186 milyon ang proyekto, kabilang ang ₱2 milyon para sa equipment. Nakapaloob dito ang 16 kVA solar hybrid energy system na may 80 kWh battery storage, na inaasahang makababawas sa pagdepende sa conventional power grid at operational energy costs. Tinatayang 2,038 rehistradong mangingisda sa bayan ang makikinabang sa pasilidad.
Inilunsad naman sa Barangay Hinugusan ang San Agustin Smart Information, Navigation, and Access Gateway (SASINAG) Tourism Kiosk, isang interactive kiosk na nagbibigay ng real-time na impormasyon tungkol sa mga tourist destination, transportasyon, accommodation, lokal na produkto, emergency contacts at public services.
May kabuuang project cost na ₱1.55 milyon ang SASINAG. Bukod sa pagpapadali ng access sa impormasyon para sa mga turista, layunin din nitong isulong ang mga lokal na negosyo at suportahan ang data-driven tourism planning sa San Agustin.
Ayon kay DOST Romblon Provincial Director Marcelina Servañez, inaasahang mapalakas ng mga inisyatibang ito ang ugnayan ng mga national government agencies, LGUs at iba pang stakeholders, habang ipinakikita ang paggamit ng science, technology and innovation sa governance, turismo, disaster resilience at community livelihoods sa San Agustin at iba pang bahagi ng rehiyon.
Discussion about this post