Itinutulak ng Department of Science and Technology (DOST) ang pagbuo ng mga inobasyong nakabatay sa aktuwal na pangangailangan ng mga komunidad upang matiyak na ang mga teknolohiyang ipatutupad sa Romblon ay magiging angkop, kapaki-pakinabang at may konkretong epekto sa mga mamamayan.
Sinabi ni DOST Secretary Renato U. Solidum Jr. na mahalagang maging bahagi ng proseso ng innovation ang mga lokal na lider, guro, magsasaka, negosyante at iba pang residente dahil ang kanilang mga karanasan at pangangailangan ang magsisilbing batayan sa pagbuo ng mga teknolohiya.
Tinawag ni Solidum na “fit-for-purpose innovation” ang ganitong pamamaraan, kung saan ang science and technology ay direktang tumutugon sa mga problema at pangangailangan ng mga komunidad.
Ayon sa kalihim, mahalagang hindi lamang nakatuon ang innovation sa pagbuo ng bagong teknolohiya, kundi sa kung paano ito magiging kapaki-pakinabang sa mga taong gagamit nito.
Kaugnay nito, sinabi ni Solidum na nais ng DOST na makita ang mga isla ng Romblon hindi bilang mga hiwa-hiwalay at malalayong komunidad, kundi bilang mga sentro ng katatagan at oportunidad.
“Ang pangarap natin ay makita ang ating mga isla, tulad po sa iba't ibang isla dito sa Romblon, hindi bilang mga malalayong tuldok sa mapa kundi bilang mga sentro ng inobasyon, katatagan at oportunidad,” ani Solidum.
Binigyang-diin niya na ang patuloy na pamumuhunan sa mga tao, pagpapalakas ng partnerships at paggamit ng science and technology sa paggawa ng mga desisyon ay makatutulong upang malampasan ang mga hamon na dulot ng pagiging isang island province.
Sinabi ni Solidum na kaya ng mga taga-Romblon na manguna at mangarap, at makapag-ambag sa pagpapabuti ng pamumuhay sa lalawigan sa pamamagitan ng paggamit ng science, technology and innovation.
