Dalawang most wanted person ang magkahiwalay na naaresto ng mga operatiba ng Philippine National Police (PNP) sa San Fernando at Cajidiocan, Romblon nitong Agosto 15 at 16, kabilang ang mga suspek na nahaharap sa mga kasong Qualified Rape.
Sa San Fernando, isang lalaki naang naaresto sa Barangay Agtiwa bandang alas-7 ng gabi ng August 15.
Naaresto ang suspek sa bisa ng warrant of arrest na inilabas noong Agosto 14, 2026 ng Regional Trial Court Branch 106, Fourth Judicial Region, para sa kasong Qualified Rape of a Minor sa ilalim ng Republic Act No. 8353, kaugnay ng Republic Act No. 11648. Walang inirekomendang piyansa para sa kaso.
Samantala, sa Cajidiocan, isang lalaki na kabilang sa Rank No. 3 Regional Most Wanted Person ang naaresto sa Barangay Cambajao bandang alas-1:05 ng hapon nitong August 16.
Naaresto ang suspek sa bisa ng warrant of arrest na inilabas noong Hulyo 22, 2026 ng Regional Trial Court Branch 106, Sibuyan, Romblon, para sa tatlong counts ng Qualified Rape sa ilalim ng Article 266-A, Paragraph 1(d) ng Revised Penal Code, na inamyendahan ng Republic Acts No. 8353 at 11648.
Ayon kay PCOL Rexton F. Sawi, Provincial Director ng Romblon Police Provincial Office, ipinakita ng magkahiwalay na operasyon ang patuloy na pagtutulungan ng iba't ibang yunit ng PNP sa paghahanap at pag-aresto sa mga wanted person.
Patuloy naman ang kampanya ng Romblon Police Provincial Office laban sa mga wanted person at hinihikayat ang publiko na magbigay ng napapanahon at tumpak na impormasyon na makatutulong sa mga awtoridad.
