Ipinahayag ni Congressman Eleandro Jesus “Budoy” Madrona na susuportahan ang pagpapalawak ng tourism kiosk initiative sa iba pang bayan ng Romblon upang mas maraming lokal na destinasyon, produkto at serbisyo ang maipakilala sa mga turista.
Sa kanyang mensahe sa paglulunsad ng serye ng science, technology and innovation (STI) initiatives ng Department of Science and Technology (DOST) sa San Agustin noong Agosto 16, sinabi ni Madrona na nais niyang suportahan ang pagkakaroon ng tourism kiosks hindi lamang sa San Agustin kundi maging sa iba pang bayan ng lalawigan.
Ayon kay Madrona, nakipag-usap na siya sa dalawa hanggang tatlong alkalde na nagpahayag ng interes na magkaroon ng tourism kiosk at handang maglaan ng pondo para sa naturang proyekto sa kanilang mga bayan.
“We're not only concentrating on San Agustin, we are also distributing to other 219 barangays for them to be able to input here,” ani Madrona.
Ipinaliwanag niya na nais niyang mabigyan ng pagkakataon ang 219 barangay ng Romblon na makapag-input ng kanilang mga datos sa tourism information system upang maisama ang kanilang mga atraksyon at iba pang tourism-related information sa platform.
Sa kasalukuyan, mayroon nang tourism kiosk sa San Agustin at isa sa Tugdan Airport na naglalayong magsilbing information point para sa mga turista at bisitang nais tuklasin ang mga pasyalan at iba pang tourism offerings ng bayan.
Sa pamamagitan ng pagpapalawak ng sistema, mas maraming impormasyon mula sa iba't ibang bahagi ng lalawigan ang maaaring maging accessible sa mga turista, kabilang ang mga lokal na atraksyon, tourism products, restaurants, hotels, resorts at iba pang negosyo.
Naniniwala si Madrona na makatutulong ang teknolohiya upang mas maipakilala ang mga tourism destination ng Romblon at mabigyan ng mas malawak na exposure ang mga lokal na negosyo at komunidad.
Ang inisyatiba ay bahagi ng pagsusulong ng paggamit ng science, technology and innovation upang mapahusay ang serbisyo publiko at suportahan ang tourism development sa mga island municipality ng lalawigan.
