Nasa 95 mag-aaral mula sa iba't ibang barangay sa Odiongan ang napiling benepisyaryo ng Municipal Government Scholarship Program na pinopondohan ng Local Youth Development Office (LYDO) upang matulungan silang maipagpatuloy ang kanilang pag-aaral.
Ipinamahagi ang scholarship slots sa bawat barangay, kung saan ang mga Sangguniang Kabataan (SK) ang nagsagawa ng assessment at pagpili ng mga kwalipikadong benepisyaryo. Nakiisa rin sa programa ang mga SK Chairperson sa pangunguna ni SK Federation President Kyert G. Fabella.
Sa orientation, ipinaliwanag ni Engr. Reden F. Escarilla, Local Youth Development Officer, ang nilalaman ng Memorandum of Agreement (MOA) na nagsasaad ng mga tungkulin at responsibilidad ng mga scholar at ng kanilang mga magulang o guardian.
Batay sa MOA, kinakailangang mapanatili ng mga scholar ang General Weighted Average (GWA) na hindi bababa sa 2.5, manatiling regular na estudyante, at kunin ang kinakailangang academic load sa kanilang kurso. Inaatasan din silang magsumite ng certified copy ng kanilang grades, certificate of registration o enrollment, at iba pang dokumentong hinihingi ng Municipal Scholarship Committee kada semestre.
Bukod dito, kinakailangan ding lumahok ang bawat scholar sa hindi bababa sa isang Youth Development Program ng lokal na pamahalaan sa bawat semestre. Nakasaad din sa kasunduan na hindi maaaring ilipat sa ibang tao ang scholarship at maaari itong suspendihin o bawiin kung hindi masusunod ang itinakdang mga alituntunin.
Nagbigay rin ng mensahe si Mayor Roger “Toto” Q. Fodra Jr., kung saan hinikayat niya ang mga kabataan na ipagpatuloy ang kanilang pag-aaral sa kabila ng mga hamon.
“Huwag ninyong payagan na pigilan kayo ng kahirapan para sa inyong mga pangarap. Ang susi ay determinasyon, hard work, at of course, perseverance,” ani Fodra.
Discussion about this post